پوتین سەرپەرشتی مانۆڕێکی سەربازی وڵاتەکەی دەکات
ڤلادیمێر پوتین، سەرۆکی رووسیا رایگەیاند، ئەگەری دروستبوونی ناکۆکی لە جیهان و ناوچەکەدا هێشتا زۆرە و جەختیشی لەوە کردەوە کە وڵاتەکەی ئاگاداری پلانەکانی ئۆکرانیایە بۆ بەکارهێنانی “بۆمبی پیس”.
پوتین ڕاپۆرتی سێرگی شۆیگوی وه‌زیری به‌رگری ڕوسیای سه‌باره‌ت به پێشکه‌وتنی مه‌شق و ڕاهێنانی هێزه‌کانی پێگه‌یشت.
کرملین لە بەیاننامەیەکدا رایگەیاندووە، “بە سەرپەرشتی سەرۆکی روسیا، مەشقی رێگریی ستراتیژیی هێزە وشکانی و دەریایی و ئاسمانییەکانی روسیا ئەنجامدراوە، لەو ماوەیەدا مووشەکی بالیستی و کروز هەڵدراون”.
لە راگەیەندراوەکەدا هاتووە: “مووشەکی بالیستیکی نێوان کیشوەری (یارس) لە بنکەی پلێسێتسکەوە هەڵدراوە، هەروەها مووشەکی بالیستیکی (سینێڤ) لە دەریای بارێنتسەوە بەرەو رێڕەوی کورا لە کامچاتکا هەڵدراوە.
هەروەها فڕۆکەی دوور مەودای Tu-95MS بەشدارییان کرد و مانۆرەکە 5 ڕۆژ پێش دەستپێکردنی ئۆپەراسیۆنی سەربازی تایبەتی ڕوسیایە لە ئۆکرانیا.
سێرگی شویگو وەزیری بەرگری روسیا رایگەیاند “لەژێر چاودێری پوتین، مانۆرەکە ئەنجامدرا”.