یۆنان: مامەڵەی تورکیا لەگەڵ پەنابەران شەرمەزارییە

وەزیری کۆچبەرانی یۆنان رایگەیاند، هەڵسوکەوتی تورکیا بەرانبەر 92 پەنابەر مایەی شەرمەزارییە و نۆتیس میتاراچی رایگەیاند، پێویستە ئەنقەرە لێکۆڵینەوە لە رووداوەکە بکات.

دوێنێ شەممە 15-10- 2022، هێزە ئەمنییەکانی یۆنان لەسەر سنووری نێوان یۆنان و تورکیا، 92 کۆچبەریان دۆزیەوە کە سەرجەمیان پیاو بوون و جلوبەرگیان لەبەردا نەبووە.

ئیسماعیل چاتاکلی، وتەبێژی وەزارەتی دەرەوەی تورکیا لە تویتێکدا بە وەزیری کۆچبەرانی یۆنان دەڵێت: ” دەتانەوێت زوڵمەکەی خۆتان بخەنە ئەستۆی تورکیا”.

گوتەبێژی وەزارەتی دەرەوەی تورکیا هۆشداری دایە یۆنان و رایگەیاند: لەبری ئەوەی خەریکی ساختەکاری و دەستێوەردان بن، پابەندی مافەکانی مرۆڤ بن.