وەزارەتی نەوتی عێراق ڕایگەیاند، لە مانگی شوباتدا ئاستی بەرهەمهێنانی ئەو وڵاتە گەیشتووەتە 4 ملیۆن و 270 هەزار بەرمیل لە ڕۆژێکدا، ئەمەش لە کاتێکدایە کە سنووری دیاریکراوی 4 ملیۆن بەرمیل لە ڕۆژێکدا.
مانگی یەکی ساڵی ڕابردوو عێراق بە ڕێژەی 194 هەزار بەرمیل لە ڕۆژێکدا سنووری دیاریکراوی تێپەڕاند، ئەمەش وایکرد وەزیری نەوتی عێراق پابەندبوونی عێراق بە ڕێککەوتنی “ئۆپێک+” پشتڕاست بکاتەوە و بەرهەمهێنانی بۆ ئەو سنوورەی کە ڕێککەوتن لەسەر کراوە کەمبکاتەوە.
سەرەڕای لێدوانەکانی وەزیری نەوت سەبارەت بە پێویستی چارەسەرکردنی هەر زیادبوونێک کە لە پابەندبوونی عێراق زیاتر بێت، بەرهەمی مانگی شوبات شایەتی زیادبوونی ٧٦ هەزار بەرمیل لە ڕۆژێکدا بە بەراورد بە مانگی یەکدا بەخۆیەوە بینی، ئەمەش گوزارشتە لە پابەندنەبوونی عێراق بە کەمکردنەوەی بەرهەمی خۆی.