پۆلیسی هەولێر: دوو کەسمان دەستگیرکرد کە مادەی هۆشبەر و چەک و چەقۆیان پێبووە

وتەبێژی پۆلیسی هەولێر ڕایگەیاند، دوو تۆمەتباریان دەستگیرکردووە و لەکاتی دەستگیرکردنیشیاندا چەند جۆرێک لە ماددەی هۆشبەر، چەک، فیشەک و چەقۆیان پێ بووە.
مقەدەم هۆگر عەزیز، وتەبێژی پۆلیسی هەولێر ڕایگەیاند، کاتژمێر 1:00ی بەیانی ئەمڕۆ، پۆلیسی فریاکەوتنی هەولێر دوو تۆمەتباریان دەستگیرکردووە کە چەند جۆرێک هۆشبەر، چەک، فیشەک و چەقۆیان پێبووە.
تۆمەتبارەکان ناویان (م. ا. ن) و (م. ی. خ)ـە و بە تۆمەتی تەقەکردن دەستگیرکراون و ئۆتۆمبێلێکی جۆری (BMW)یان لا بووە، لە کاتی دەستگیرکردنیاندا دەست گیراوە بەسەر 44.8 گرام کریستاڵ، 82.6 گرام حەشیش، 73.255 گرام جامایکا، کلاشنکۆفێک، مەخزەنێکی بەتاڵ، 33 فیشەک، دەمانچەیەکی جۆری تورکی و 17 فیشەک، 3 دانە پایپی بەکارھێنانی کریستاڵ، 2 چەقۆ، 80 دەنکە حەبی ترامادۆڵ، 3 بوتڵ خواردنەوەی کهولی لەگەڵ تەرازووی کێشانی ماددەی ھۆشبەر.
هەردوو تۆمەتبارەکە بە مەبەستی گرتنەبەری رێکارە یاساییەکان، رادەستی بەشی پۆلیسی نەهێشتنی تاوان کراون”