چوارچێوەی هەماهەنگی لەبەردەم بڕیاری یەکلاییکەرەوەدایە
بڕیارە ئەمڕۆ سەرکردەکانی چوارچێوەی هەماهەنگی کۆبوونەوەیەک بۆ یەکلاییکردنەوەی کاندیدی سەرۆکوەزیران و دۆزینەوەی ڕێگەچارە بۆ گرفتی مووچەی فەرمانبەران ئەنجام بدەن.
بەهای ئەعرەجی، سەرۆکی فراکسیۆنی هاوپەیمانیی ئاوەدانکردنەوە و گەشەپێدان ئاماژەی بەوە کردووە کە لایەنەکانی ناو چوارچێوەی هەماهەنگی جەخت لە پابەندبوون بە وادە دەستوورییەکان دەکەنەوە کە 15 ڕۆژە.
گرنگترین خاڵەکانی ئەم پرسە بریتین لە:
کاندیدە دیارەکان: تا ئێستا نووری مالیکی و محەممەد شیاع سوودانی وەک کاندیدی سەرەکی دەبینرێن.
ئەگەری نوێ: دەنگۆ ئەوەی هەیە نووری مالیکی، عەلی شوکری، وەزیری پێشووی سەر بە ڕەوتی سەدری وەک کاندیدێکی نوێ پێشنیاز کردبێت و ڕەزامەندیی سەرەتایی لەسەر وەرگیرابێت.
چارەنووسی کۆبوونەوەکە: پێشبینی دەکرێت کۆبوونەوەکەی ئەمڕۆ یەکلاییکەرەوە بێت، هەرچەندە ئەگەری هەیە گفتوگۆکان تا کۆتا ساتەکانی مۆڵەتە دەستوورییەکە بە کراوەیی بمێننەوە.
بەشێکی دیکەی کۆبوونەوەکە تایبەت دەبێت بە لایەنی دارایی و بژێوی هاووڵاتیان. بەهۆی بوونی کورتهێنانی دارایی و گرفتی تەکنیکی لە دابینکردنی مووچەدا، سوودانی پێشنیازێکی خستووەتە ڕوو، حکومەت دەیەوێت پەنا بۆ یاسایەکی نوێی قەرزکردن ببات بۆ پڕکردنەوەی کورتهێنانی مووچە، هەروەها چاوەڕوان دەکرێت ئەم پێشنیازە لە کۆبوونەوەی هەفتەی داهاتووی ئەنجوومەنی وەزیراندا پەسەند بکرێت.
سەرچاوە ئاگادارەکان ئاشکرایان کردووە شەوی دووشەممە لە ماڵی نووری مالیکی، کۆبوونەوەیەک بە ئامادەبوونی سەرکردە باڵاکانی شێعە بەڕێوەچووە. لەو کۆبوونەوەیەدا جگە لە پرسی کاندیدەکان، کارنامەی دانیشتنی داهاتووی پەرلەمان تاوتوێ کراوە.