لەسەر سکاڵای بەرهەم ساڵح، سەرۆککۆماری عێراق، ڕۆژنامەنووسێک لە سلێمانی دەستگیرکرا و سەندیکای ڕۆژنامەنووسانیش لە هەوڵدایە بۆ ئەوەی بە کەفالەت ئازادی بکات.
کاروان ئەنوەر، سکرتێری لقی سلێمانیی سەندیکای رۆژنامەنووسان بە تۆڕی میدیایی باڵکێشی راگەیاند، ئەمڕۆ سێشەممە رۆژنامەنووس بەهرۆز جەعفەر، لەسەر سکاڵای نوێنەرێکی سەرۆککۆماری عێراق و بە بڕیاری دادوەر لە سلێمانی دەستبەسەر کراوە.
کاروان ئەنوەر دەڵێ”دەستگیرکردنەکە بە تۆمەتی ناوزڕاندنی سەرۆککۆمارە، ئێمەش پێمان وایە ئەو وشانەی بەهرۆز بەکاریهێناون دوورن لە دونیای رۆژنامەگەری”.
دەقی ئەو وتارەی کە بەهرۆز جەعفەر لەسەری دەدرێتە دادگا
تا کەی سەرۆک کۆمار ڕۆنگ ساید لێ ئەخوڕێت!؟
ئێمە بە هەموو تێگەیشتن و توانامانەوە، لە میدیا، لەناو حیزبەکان، لە ئاژانسە جیهانیەکان، لە میتینگی ئۆفیسەکانی خۆمان، لۆبیمان بۆ بەرهەم ساڵەح ئەکرد تا بچێتە بەغدا!؟ بۆ ئەوەی هەڕەشەکان لەوەها سەردەمێکی ئاڵۆزدا لەسەر کوردستان کەم بکاتەوەو، دەرفەتەکان زۆرتر بکات. کەچی ئەو هەر گەیشتە بەغدا خۆی بو بە هەڕەشە و دەرفەتەکانیش کەمبونەوە!.
(١)
لەسەر ئاستی کەرکوک و هەرێمی کوردستان، نەک تا ئەوپەڕی «بەرهەم ساڵەح» بێدەنگ و بێ هەڵوێستی هەڵبژاردوە، بەڵکو ئەگەر لایەنێک یان دۆستێکی کورد ویستویانە هاریکاریی هەرێم و خەڵکی کوردستان بکەن، ئەوا سەرۆک کۆمار ڕێگربوە. زیندوترین نمونە لەمدواییە حکومەتی هەرێم داوای لە خاوەن کۆمپانیاو ملیاردێرەکانی کوردستان کرد، هاوکاری حکومەت بن، بەرهەم ساڵەح بە پێچەوانەوە هانی داون کە باج و هاوکاری بە حکومەت نەدەن، یەکێک لەو ملیاردێرانە کوردانەی هەرێم (ئە، ئی) ە کە ماوەیەکە لە بەغداو بەسرەو ئەنبار خەریکی لۆبی کردنە بۆ چەند پرۆژەیەکی گەورە، لە بەرئەوەی لە باج بەخشراوە، پارەی لەسەر حکومەتی هەرێم بوە، کەچی لەو کاتە سەخڵەتەدا ئەو سەرمایەدارە داوای قەرزەکانی لە حکومەتی هەرێم کردوەتەوە…نکۆڵی لەوە نییە هەرێمی کوردستان بەدەست حیزبەکانەوە بوەتە پەند و گەندەڵی هەیەو سیستەمێکی دارایی نییەو…تادوایی. بەڵام ئەوکاتەی بەرهەم ساڵەح سەرۆکی حکومەتی هەرێم بو، نرخی بەرمیلێک نەوت (١١٥) دۆلار بو، مام جەلالیش لە گۆرەپانەکەدا بو. شەڕی داعش نەبو، ملیۆن و نیوێک ئاوارە نەبو، بودجە بڕین و دەستهەقی کۆمپانیا نەوتیەکانیش لە ئارادا نەبو. پەتای کۆرۆنا نەبو، هێشتا (٦) ملیار دۆلاری شیرینی نەوتەکە لەسەردەمی حکومڕانیەکەی بەرهەم ساڵەح دا دیار نەما و ئێستاش کەس نەی پرسی بۆ کوێ چو!؟. ناوبراو هانی نزیکەکانی خۆی ئەدا بڵێن (٥٠٠) هەزار بندیوار هەیە لەهەرێم، لەکاتێکدا ڕوونە ئەو بندیوارانە قوباد تاڵەبانی و مەسرور بارزانی دای نەناون، بەڵکو بە پێی مەحزەری کۆبونەوەی مەکتەبی سیاسی (ی،ن،ک) دەرکەوتوە لەسەردەمی بەرهەم ساڵەح دا دانراون…بەرهەم ساڵەح دوو ساڵە سەرۆک کۆمارە، بۆ یەک جاریش فزەی لێوە نەهاتوە بەرانبەر داگیرکردنی (٣٥٠) هەزار دۆنم زەوی کوردەکان لە کەرکوک لەلایەن عەرەبە هاوردەکانەوە. پارێزگاری بە زۆر داسەپێنراوی کەرکوک زیاتر لە (٤٥) بەڕێوەبەری کوردی لە شارەکە گۆڕیوە، لەکاتێکدا سەرۆک کۆمار کوردەو بتوانێت تەعریب و کوشتن و دەربەدەرکردنی کورد ڕابگرێت و نەیکات ئیتر بەکەڵکی چی دێت جگە لە خۆی!؟. بە پێی دەستوریش بێت پارێزەری دەستورە ئەم (چەکە) ی بۆ کەی هەڵگرتوە؟. ئەیەوێ بە دوو سێ تەلەفۆن بۆ بەرپرسی مەڵبەند لە شارەکە پاڵپشتی خۆی دووپات بکاتەوە بەرانبەر ڕووداوەکانی داقوق و کەرکوک…!. یان جەوهەری مەسەلەکە ئەوەیە لە ترسی عەرەبەکان لە هەموو شتێک بێدەنگە بۆ ئەوەی بۆ خولێکی تر وەک سەرۆک کۆمار هەڵی بژێرنەوە!؟.
(٢)
تەیموری ئەنفال، سەرجەم کەسوکارەکەی و زیاد لە (١٠٢) کەسی خانەوادەکەی زیندەبەچاڵکراون، تاقانەیەکە خۆی وتەنی خوا بۆ ئەوە هێشتویەتیەوە تا ڕاستی پڕ تراژیدیای ئەنفالەکان بۆ جیهان بگێڕتتەوەو هەر لەم دونیا ببێتە شایەت بەسەر تاوانبارانەوە. کەچی سەرۆک کۆمار کە هەموو جارێک پرسی ئەنفال بۆ دیکۆرو خۆڵکردنە چاوی خەڵک بەکارئەهێنێت، ماوەی زیاتر لە ساڵێکە هەڕەشەی جۆراوجۆر لە «تەیموری ئەنفال» ئەکات. لەبەرئەوەی تاقانەیەکی بێ کەس داوای کردوە کەسابەت و بازرگانی بە کەللە سەری دایک و باوکیەوە نەکرێت لە گۆڕە بەکۆمەڵەکانی سەماوەو، جاشەکان «کە هاوڕێی سەرۆک کۆمارن» دووربخرێنەوە. لە چەندین شوێندا بەرهەم ساڵەح بە تەیموری وتوە «بێ حورمەت!». بەهەرحاڵ ئەمە سروشتی پیاوێکە کە خاوەنی تاکە هاوڕێیەکی ڕاستەقینە نییە.
(٣)
سەرۆک کۆمار، لەبەرئەوەی خۆی لە شەقامی کوردی و عێراقی دا هەیبەتی نەماوەو دەیان کەیسی لەسەرە. موستەفا کازمی کردوە بە ڕووکاری پرۆژەکانی خۆی و، لە تاریکیدا لەمسەری دونیا بۆ ئەوسەری دونیا خەریکی کۆکردنەوەی پاڵپشتی دۆزینەوەیە بۆ کازمی!. هەر لەسەرەتاوە تەلەفۆنی بۆ سی ئێن ئێن کردوە کە بەرنامەی گرنگی لەسەر بکەن، تا ئێستا کە لە هەولێرو سولەیمانی خەریکی خەڵک و کەسایەتی و میدیا کڕینە بۆ ئەوەی دژی هەرێمی کوردستان بنوسن و پاڵپشتی کازمی بکەن!. ساڵونیوێک پێش ئێستا نیەت و پرۆژەی ئابڵوقەدانی کوردستان لە ڕێگەی لێ سەندنەوەی خاڵە سنورییەکان و کردنەوەی سنوری ووشکانی نوێ لە نێوان عێراق- تورکیام لە نوسیندا خستە ڕوو کە چەپکە گوڵ و ڕەیحانەی بەرهەم ساڵەحە!.
(٤)
لە هەرێمی کوردستان گەندەڵی هەیەو، خۆراکی بەسەرچوو دێتە ناوەوەو، داهات ڕوون نییە. بەڵام پشکی عێراق لە بودجە (٨٨٪) بوەو هی هەرێمی کوردستان (١٢٪)، کورتهێنان لە بودجەی عێراقی ساڵی (٢٠١٩) ەدا (٧٠) تریلیۆن و لە (٢٠٢٠) یشدا (٤٠) تریلیۆن ئەبێت. بۆچی تەنها لە (١٠) تریلیۆن دینار پشکی هەرێمدا کێشەتان هەیە!؟. هەر بەجدیی مەلا ماتۆڕ یان تەها محێدین مەعروف نەخێر تەحسین شاوەیسەکان زۆر لە ئێوە ساڵەح تر نەبون!؟. بابەتەکە پەیوەندی بەمانەوە نییە. بەڵکو پەیوەندیی بەوەوەیە کە سەرۆک کۆمار ئەیەوێ لە ڕێگە سوک و سەلیم نیشاندانی هەرێمی کوردستانەوە بڵێ هەموان وەک من بێ حورمەتن!. بەڵکە ئەوە ئێمەین پرۆژەیەکی چاکسازیی و دژە گەندەڵیمان لە کۆڵ ناوە. بۆ ئەمەش لەسەرێکەوە دەستی داوەتە تەرویج کردن بۆ کازمی، ڕۆژێک لە ڕێی پەرلەمانتارێکەوە داوا ئەکا مووچەی فەرمانبەرانی هەرێم لە بەغداوە بدرێت. ڕۆژێک کار بۆ ئەوە ئەکا چەک لە شانی پێشمەرگە بکاتەوە، ڕۆژێک دەستی داوەتە سایت و پەیج و خەڵکی پاتاڵ و سواو کڕین…
(٥)
خۆ- هەڵواسین بە کازمی دا دادی کەس نادات. ئەو ئیش و هەوڵانەی کازمی ئەم ماوەیە کردویەتی کۆنن. بۆ نمونە ئەم جرت و فرتەی لە نێوان عێراق و ئەردەندا هەیە، ئه‌م پرۆژه‌یه‌ی حكومه‌تی عێراق به نیازە جێبه‌جێی بكات له سه‌رده‌می حكومه‌تی پێشوودا بیری لێكراوه‌ته‌وه و له ساڵی 1979 له به‌رنامه‌یاندا بوو لووله‌یه‌ك له نێوان هه‌ردوو وڵاتدا رابكێشن كه رۆژانه 1 ملیۆن به‌رمیل نه‌وت لێوه‌ی هه‌نارده‌ی سه‌ر ده‌ریای سوور بكرێت كه ئوردون زۆر سوودمه‌ند ده‌بوو به‌ڵام به هۆی هه‌ڵگیرسانی شه‌ری عێراق ئێرانه‌وه پرۆژه‌كه په‌كیكه‌وت . لە ساڵی (٢٠٠٢) پەکی کەوت. لەساڵەکانی (٢٠٠٦) و (٢٠٠٨) و (٢٠١١) دا عێراق گرێبەستی لەگەڵ ئەردەن کردوە بۆ هەناردەکردنی نەوت بەتەنکەر و بە ڕاکێشانی بۆڕی. بەڵام هەموو ئەو جارانە دۆخی ئەمنی تێکچوەو پرۆژەکان لە نیوەدا لە ڕەگ و ڕیشەوە دەرهاتون.
(٦)
سەرۆک کۆمار کە حیزبی «هاوپەیمانی بۆ دیموکراسی و دادپەروەری» فرۆشت و گەڕایەوە ناو یەکێتی نیشتیمانی کوردستان، تەنانەت تەپڵەکێکی بۆ پاشماوەی حیزبەکە جێ نەهێشت، بگرە پەردەکانیشیان لەگەڵ خۆیان برد. کەچی ماوەیەکە دەستی داوەتەوە تەمویلکردن و پاڵپشتی دارایی حیزبە کۆنەکەی، لەهەمان کاتیشدا بۆ خۆی ئەندامی سەرکردایەتی یەکێتی نیشتیمانی کوردستانە.!. هەموو ئەمانەش بۆ ئەوەی بە سود وەرگرتن لە یاسای نوێی هەڵبژاردن چەند کاندیدو وردە حیزب و میدیایەک بکڕێت و فێڵ لە چاوی دەنگدەرو خەڵکی بەشمەینەتی کوردستان بکەنەوەو، دیسانەوە خۆ- فرۆشانە لە بەغدا سەربکەنەوە بەناو یەکدا!!. سەرۆک کۆمار پێویستی بە سێ و چوار کورسیەکە بە ڕێگەی قۆستنەوەی ناڕەزایی خەڵک و کاندیدی نا ڕاستەوخۆوە، چونکە لە بنەمادا ئەمانە بە کرێگیراوی دەرەکین زۆر منەت و پێویستیان بە دەنگی میللەتیش نییە.!. پێویستە «بەرهەم ساڵەح» بزانێت، کە هەموو ئەو داخ و ناخە پڕەی بەرانبەر کوردو کوردستان هەیەتی جگە لە خۆی کەسی دیکە ناسوتێنێت. ئەمسەر بۆ ئەو سەری چوار پارچەی کوردستان بگەڕێ، کۆڵان بە کۆڵانی کوردستان، تەنها یەک ووشە هەیە بۆ ئەو، ئەویش «بێ حورمەت!». تۆ ناتوانی لەگەڵ دەوروبەرەکەی خۆت ڕاستگۆ بیت چۆن بانگەشەی سیستەمی هەرێمایەتی هاوبەش ئەکەیت لە ناوچەکەدا!!. کورد وتویەتی گوێز بە ژمارە مایەکەی دیارە، ئەوە دوو ساڵە لە بەغدای، پێشوتریش هەشت ساڵ لە بەغدا بوی «مەلەفەکانت دیارن» چیت بۆ کورد و چەندت بۆ خۆت بردوە!. باسی جێبەجێکردنی ماددەی (١٤٠) ناکەین ئایا بە هەموتانەوە لەو بەغدایە توانیوتانە کێشەی گەنمی جوتیارانی کورد چارەسەر بکەن!؟.
(٧)
سەرۆک، دوای چەند مانگێک لەوەی کە بوە سەرۆک کۆمار، لەکاتی گەڕانەوەی بۆ شاری سولەیمانی، هەر لە فرۆکەخانەوە تا ناوشار بە پێچەوانەی یاساوە ڕۆنگ ساید ئۆتۆمبیلەکانی لێ خوڕیوە…ئەمە لە ڕووی دەروونناسیەوە هیچ مانایەک نادات جگە لەوەی لە ناخی کەسەکەدا کەموکورتی هەیە. ئەگەر ووردی بکەینەوە هەموو هەنگاوەکانی بەرهەم ساڵەح رۆنگ ساید بوە ئێمە نەمانزانیوە…تاکە ڕایت سایدی ئەو ئەوە بوو کە دوای جیابونەوەی لە یەکێتی خۆی دانی پیاناوە و ئەڵێت « بە ڕاستی عەیبە ئینسان ببێت بە بەشێک لە سەفقەیەکی گوماناوی و لەسەر حیسابی مووچەی خانەنشینی مامۆستایەک»!. زۆر بە ڕوونی دیارە، کە لە هەرێمی کوردستان ئاسایش و یاساو سیستەم نییە، چونکە ئەگەر هەبوایە ئەو دەزگایانە ڕۆژێک پێیان ئەگوتیت ئەمە کۆمەڵگای کوردستانەو لەمە زیاتر مافی تۆ نییە ئیش لەسەر بنکۆڵکردنی قەوارەی کوردیی بکەی لە پێناو بەرژەوەندیی خۆت و کورسیەکەی خۆت.!. بایی ئەوەندە کورد بە!. کە لە بەغدا بۆنی ئاشوب ئەکەی لانە ئارامەکەی مێرگەپانت بمێنێت!. ئەوەندە بۆ بەرژەوەندی خۆت کوردستان بەکار مەهێنە چونکە سوبحەینێ شەڕو تەقینەوە دەستی پێکرد لە بەغدا ڕائەکەیتەوە بۆ هەرێمی کوردستان.!.عەیبە کارو پلانی سەرۆک کۆمار ئەوە بێت فەیسبوکی تەزویر دروست بکات بۆ ئەوەی خەریکی بەپاڵەوانکردنی مستەفا کازمی بێت!.