ئەنجامی هێرشەکەی سەر کۆرمۆر ئاشکرا دەکرێت
گوتەبێژی فەرماندەی گشتیی هێزە چەکدارەکانی عێراق ڕایدەگەیەنێت، ئەو لیژنە باڵایەی بە فەرمانی محەممەد شیاع سودانی پێکهێنراوە، بە شێوەیەکی مەیدانی گەیشتوونەتە شوێنی ڕووداوەکە و دەستبەجێ کارەکانیان دەست پێ کردووە، جەختیش دەکاتەوە، لە ماوەی سێ ڕۆژی داهاتوودا دەرئەنجامی کۆتایی ڕادەگەیەنن.
سەباح نوعمان لە لێدوانێکی ڕۆژنامەوانیی ئاشکرای کرد، لیژنەکەی لێکۆڵینەوەکە بە مەبەستی وردبوونەوە لە وردەکاری و هۆکارەکانی ڕووداوەکە، سەردانی مەیدانییان بۆ کێڵگەی کۆرمۆر کردووە و دەستیان بە کۆکردنەوەی بەڵگەکان کردووە.
بە گوتەی نوعمان، کارەکانی لیژنەکە زۆر بە چڕی بەڕێوەدەچێت و بەشێوەیەکی دەستبەجێ دەستیان بە ڕێکارەکان کردووە، بۆیە پێشبینی دەکرێت لە ماوەی 72 کاتژمێری داهاتوودا ئەنجامی کۆتایی لێکۆڵینەوەکان ئامادە بێت و بۆ ڕای گشتی و لایەنە پەیوەندیدارەکان ئاشکرا بکرێت.
ئەم لێدوانە دوای ئەوە دێت، ئەمڕۆ هەینی، وەزیرانی ناوخۆی هەرێمی کوردستان و عێراق وەک بەشێک لە لیژنە باڵاکە گەیشتنە کێڵگەی کۆرمۆر، هێرشەکە کە شەوی چوارشەممە بە درۆن ئەنجام درا، بووە هۆی ڕاگرتنی بەرهەمهێنانی غاز و کەمبوونەوەی کارەبا، ئەمەش کاردانەوەی توندی ناوخۆیی و نێودەوڵەتیی لێ کەوتەوە و حکوومەتی عێراقیش بەڵێنی داوە بە هاوکاریی هاوپەیمانان بکەرانی ئەم هێرشە ڕاوەدوو بنێت.