شەوی رابردوو، کەسوکاری قوربانییانی رووداوەکەی قەزای حەمدانیە لە سنووری پارێزگای نەینەوا، چوونە سەر ماڵی خاوەنی هۆڵی هەیسەم لە قەزاکە.
بەگوێرەی زانیارییەکانی تۆڕی میدیایی رووداو کە لە بەرپرسێکی باڵای پارێزگای نەینەواوە وەریگرتووە، نزیکەی کاژێر 11:00ـی شەوی رابردوو، کەسوکاری قوربانییانی رووداوی ئاگرکەوتنەوەکەی بووک گواستنەوەکەی هۆڵی هەیسەم لە حەمدانیە هەڵیانکوتاوەتە سەر ماڵی خاوەنی هۆڵی هەیسەم و خانوو و ئۆتۆمبێلەکەیان سووتاندووە. دواتر تیمەکانی بەرگریی شارستانی گەیشتوونەتە شوێنی رووداوەکە و ئاگرەکەیان کوژاندووەتەوە.
کاتژمێر 10:30ـی شەوی 26ـی ئەیلوولی 2023، بنمیچی هۆڵێکی بۆنەکانی قەزای حەمدانیەی سەر بە پارێزگای نەینەوا بەناوی هۆڵی هەیسەم گڕی گرت. لە هۆڵەکەدا نزیکەی 700 کەس هەبوون، لە ئەنجامی رووداوەکەشدا زیاتر لە 120 کەس گیانیان لەدەستدا و زیاتر لە 150 کەسیش برینداربوون.
ژێدەر
رووداو