لە قوتابخانەیەکی ئەنبار 250 هەزار حەب و یەک کیلۆ حەشیش دەستی بەسەردا گیرا
هێزە ئەمنییەکانی عێراق لە قوتابخانەیەکی پارێزگای ئەنبار دەستیان بەسەر 250 هەزار حەبی هۆشبەر و کیلۆیەک حەشیش داگرت.
ئەمڕۆ چوارشەممە 28/6/2023، وەزارەتی ناوخۆی عێراق دەستبەسەرداگرتنی 250 هەزار حەبی هۆشبەر و کیلۆیەک حەشیشی لەناو قوتابخانەیەک لە پارێزگای ئەنبار راگەیاند.
لەراگەیەندراوێکدا وەزارەتی ناوخۆی عێراق رایگەیاند، “بەڕێوەبەرایەتی گشتی کاروباری ماددە هۆشبەرەکان، لە رێگەی هێزێکەوە لە ئەنبار، توانیویانە لە قوتابخانەیەک دەست بەسەر 250 هەزار حەبی ماددەی هۆشبەردا لە جۆری کاپتاگۆن و کیلۆیەک حەشیش دا بگرن، کە ئەو قوتابخانەیە لە ژێر نۆژەنکردنەوە دایە لە شاری رومادی”.
لە راگەیەندراوەکەدا هاتووە، “رێوشوێنی یاسایی پێویست بەپێی بڕیارە دادوەرییەکان گیراوەتەبەر بۆ دەستگیرکردنی ئەو تۆمەتبارانەی بەشداربوون لە تاوانەکەدا”.