بانكی ناوەندی عێراق بڕیاریدا هەموو هاووڵاتییەك بە مەرجی پێشكەش كردنی بەڵگەنامەی فەرمی، بتوانێت دۆلار بە نرخی فەرمی (100 دۆلار بە 132 هەزار دینار) لە كۆمپانیاكان و نووسینگەكانی ئاڵوگۆڕی دراو بكڕێت.
بانكی ناوەندی عێراق لە گشتاندنێكدا بۆ سەرجەم كۆمپانیاكانی ئاڵوگۆڕی دراو و نووسینگەكان، جەختی كردۆتەوە لە فرۆشتنی دۆلار بە هاووڵاتیان، بەلام بەو مەرجەی لێكۆڵینەوە بكرێت لە ناسنامەی ئەو كەسەی دۆلار دەكڕێت و ئەو بەڵگانەی پێویست پێشكەشیان بكات تاوەكو لەلایەن كەسی ترەوە دۆلارەكە بەكار نەهێنرێت.
ئاماژەی بەوەشكردووە، هەر كۆمپانیایەكی ئاڵوگۆڕی دراو پابەندی ئەو ڕێكارە نەبێت پێدانی دۆلار پێی ڕادەگیرێت و ڕەوانەی لیژنەی سزا دەكرێت بۆ غەرامەكردنی سەرپێچیكاران.
لای خۆشیەوە، بازاڕی دۆلارەكەی سلێمانی ئاماژەی بەوەكردووە، لەمەودوا هەموو هاووڵاتییەک ئەتوانیت بە نرخی فەرمی دۆلار وەربگرێت.