سوپای ئەمریکا و کۆریای باشوور بە بەکارهێنانی کەشتییەکی فڕۆکەهەڵگری ئەمریکی دەستیان بە مەشقی دەریایی هاوبەش کرد، ئەمەش دوای ڕۆژێک لە ناردنی فڕۆکەی جەنگی وەک کاردانەوەیەک بۆ مەشقەکانی کۆریای باکوور.
سەرۆکی ئەرکانی هاوبەشی کۆریای باشوور ڕایگەیاند، مانۆڕە دەریاییەکان لە ئاوەکانی کەنارەکانی ڕۆژهەڵاتی ئەو وڵاتە لە7-8ی تشرینی یەکەم بەڕێوەدەچێت.
سەرۆک ئەرکانە هاوبەشەکە ئاماژەی بەوەشکرد، کۆریای باشوور بەردەوام دەبێت لە بەرزکردنەوەی تواناکانی ئۆپەراسیۆنی و ئامادەیی بۆ وەڵامدانەوەی هەر ئیستفزازییەکی کۆریای باکوور لەڕێگەی مەشقی هاوبەش لەگەڵ کەشتی فڕۆکەهەڵگری ئەمریکی ڕۆناڵد ڕیگان و هێزە تایبەتەکەی.