ئه‌مڕۆ چوارشه‌م 22ی كانوونی یه‌كه‌م، له سه‌ڵاحه‌دین سه‌رۆك مه‌سعوود بارزانی پێشوازی له شاندێكی باڵای چوارچێوه‌ی هاوئاھه‌نگی به سه‌رۆكایه‌تیی نووری مالیكی كرد.
له كۆبوونه‌وه‌كه‌دا ده‌رئه‌نجامه‌كانی ھه‌ڵبژاردنی ئۆكتۆبه‌ری ڕابردووی ئه‌نجوومه‌نی نوێنه‌رانی عێراق و دوا پێشھاته‌كانی ناو پرۆسه‌ی سیاسیی عێراق، تاوتوێ كران.
ھه‌ر له‌و دیداره‌دا ڕۆشنایی خرایه سه‌ر پێویستیی پێداچوونه‌وه به حوكمڕانیی عێراق و سوودوه‌رگرتن له ئه‌زموونه‌كانی ڕابردوو، ڕه‌چاوكردنی پڕه‌نسیپه‌كانی هاوبه‌شی و سازان و ھاوسه‌نگی له پرۆسه‌ی حوكمڕانیدا.
له به‌شێكی تری ئه‌و كۆبوونه‌وه‌یه‌دا، بیروڕا له‌باره‌ی ته‌حه‌دیاتی به‌رده‌م ئاینده‌ی عێراق و بابه‌تی خزمه‌تگوزاری و ھه‌ڕه‌شه‌ی تیرۆر، كێشه‌ی ژینگه و كه‌مئاوی و داواكاریی ھاووڵاتییان، ئاڵوگۆڕ كران و دووپات له‌سه‌ر به‌رده‌وامبوونی ھه‌وڵه‌كان بۆ له‌یه‌كتر نزیككردنه‌وه‌ی بۆچوونی لایه‌نه‌كان و ئیستحقاقی پێكھاته‌كان كرایه‌وه، له پێناو دۆزینه‌وه‌ی چاره‌سه‌ری گونجاو بۆ قۆناغی داھاتوو و تێپه‌ڕاندنی ته‌حه‌دیاتی به‌رده‌م پێكھێنانی حكوومه‌تی نوێی عێراق.