جه‌مال عه‌بدوڵڵا، چاودێری سیاسی له‌باره‌ی هۆكاری په‌یڕه‌كردنی فكری پۆپۆلیستی له‌لایه‌ن بزووتنه‌وه‌ی نه‌وه‌ی نوێوه له هه‌رێمی كوردستان، كه په‌یڕه‌وێكه له‌ڕێگه‌یه‌وه یاری به هه‌ست و سۆزی خه‌ڵك ده‌كرێت و له‌پێناو پێكاندنی ئامانجێكی دیاریكراوی سه‌رمایه‌گوزاری و به‌ده‌ستهێنانی پێگه‌یه‌كی سیاسی، كه بۆ ئه‌و مه‌به‌سته‌ش سوود له گوتاری چه‌واشه‌كاری وه‌رده‌گیرێت، گوتی: هۆكاری سه‌رهه‌ڵدانی ئه‌و چه‌واچه‌كارییه بۆ ناسه‌قامگیری دیموكراسی ده‌گه‌ڕێته‌وه و هه‌رچه‌ند سیسته‌مه‌كه دیموكراسی بێت، به‌ڵام له غیابی دامه‌زراوه‌ی چاودێریكردنی دیموكراسیه‌ت، ده‌رفه‌ت بۆ سه‌رهه‌ڵدانی پۆپۆلیزم ده‌ڕه‌خسێت.
ئه‌م گوتانه‌ی جه‌مال عه‌بدوڵڵا وتی: جگه له ناسه‌قاگیری دیموكراسیه‌ت، بوونی ئازادی ره‌هاش له كۆمه‌ڵگا، هۆكارێكی دیكه‌یه بۆ سه‌رهه‌ڵدانی پۆپۆلیزم، ئه‌مه‌ش ده‌بێته هۆی دروستبوونی پشێوی و مه‌یلی تاكڕه‌وی و سه‌ركوتكاری سه‌رهه‌ڵده‌دات.
سه‌باره‌ت به واتای پۆپۆلیزم له‌ڕووی چه‌مكه‌وه، ئه‌و چاودێره سیاسییه گوتی: پۆپۆلیزم واتا كۆكردنه‌وه‌ی گه‌ل له‌لایه‌ك و نوخبه‌یه‌كی دیكه‌ی “ده‌سته‌بژێر” له لایه‌كی دیكه‌وه و وا نیشان ده‌درێت، كه ئه‌و نوخبه‌یه دژی هه‌موو تاكه‌كانی كۆمه‌ڵگه‌ن و ئه‌وه‌ی په‌یڕه‌وی گوتاری پۆپۆلیستیش ده‌كات، خۆی وا نیشانده‌دات كه نوێنه‌رایه‌تی ده‌نگی گه‌ل ده‌كات و هه‌وڵ ده‌دات خۆی به رزگاركه‌ر و فریادڕه‌سی كۆمه‌ڵگه له هزری تاكه‌كاندا بنوێنێت، ئه‌مڕۆش له كوردستان شاسوار ئه‌و نواندنه ده‌كات، له‌كاتێكدا له كۆی 64 كورسی كورد له ئه‌نجومه‌نی نوێنه‌رانی عێراق، ئه‌و ته‌نها 9 كورسی هه‌یه و ده‌یه‌وێت وا نیشان بدات كه ئه‌و 9 كورسییه ده‌نگی گه‌له و 55 كورسییه‌كه‌ی دیكه هه‌موویان له دژی گه‌لن.
جه‌مال عه‌بدوڵڵا به‌سه‌رسوڕمانه‌وه گوتی: ئه‌گه‌ر شاسوار ده‌نگی گه‌ل بێت و بانگه‌شه بۆ ده‌نگی گه‌ل بكات، له‌كاتێكدا خۆی ته‌نها 9 كورسی هه‌یه، ئه‌ی 55 كورسییه‌كه‌ی دیكه چین، كه ته‌نها گه‌ل خاوه‌نی ئه‌و 9 كورسییه بێت!! بۆیه ده‌ڵێم: دیموكراسی ناسه‌قامگیر و ئازادی ره‌ها، دوو مه‌ترسی گه‌وره‌ن، نه‌ك به‌و واتایه‌ی كه دیموكراسیه‌ت مه‌ترسیداره، به‌ڵكو ناسه‌قامگیری دیموكراسیه‌ت و نه‌بوونی میكانیزمی راستكردنه‌وه‌ی هه‌ڵه‌كانی ناو دیموكراسیه‌ت مه‌ترسیدارن، چونكه له‌ناو دیموكراسیه‌ت هه‌ڵه‌ی زۆر روو ده‌دات، به‌ڵام ئه‌م دووانه زۆر مه‌ترسیدارن و ده‌بنه هۆی سه‌رهه‌ڵدانی پۆپۆلیزم و دواجار ئه‌گه‌ر سنووری بۆ دانه‌نرێت ته‌نها به‌مه‌ش ناوه‌ستێت و سه‌ركوتكاری گه‌وره و دیكتاتۆریه‌ت و تاكڕه‌وی گه‌وره له‌ناو كۆمه‌ڵگه دێنه ئاراوه، چاره‌سه‌ری ئه‌مه‌ش ته‌نها له رێگه‌ی بوونی دامه‌زراوه‌ی دیموكراسیه‌ت بۆ چاودێریكردنه‌وه ده‌كرێت.
هه‌روه‌ها گوتی: بوونی ئازادی ره‌ها و نه‌بوونی میكانیزمی راستكردنه‌وه‌ی هه‌ڵه‌كانی ناو دیموكراسیه‌تن كه بوونه‌ته هۆی ئه‌وه‌ی كه‌سێكی وه‌ك شاسوار عه‌بدوڵواحید بتوانێت په‌یڕه‌وی گوتاری پۆپۆلیستی بكات.
سه‌باره‌ت به‌و گوتانه‌ی شاسواریش كه گوتبووی: ئه‌گه‌ر حكومه‌ت باج و گومرگ هه‌ڵگرێت، ئێمه ده‌توانین به‌نزین هاورده بكه‌ین و به نرخێكی هه‌رزان به هاووڵاتییان بفرۆشینه‌وه، كه‌چی حكومه‌ت ئاماده‌یی بۆ ئه‌و پێشنیازه ده‌ربڕی، به‌ڵام هیچ سه‌رمایه‌گوزارێك ئاماده نه‌بوو بۆ ئه‌و جۆره بازرگانییه، جه‌مال عه‌بدوڵڵا گوتی: “بۆیه ئه‌و كاره نه‌كرا، چونكه هیچ بازرگانێك ئاماده نییه له كۆتایی مامه‌ڵه‌كه‌ی ته‌نها نیوه‌ی سه‌رمایه‌كه‌ی بۆ بگه‌ڕێته‌وه” و گوتیشی: كاتێك شاسوار ئه‌و پێشنیازه‌ی كرد، نه‌یزانی حكومه‌ت ده‌ڵێت: “فه‌رمو”، بۆیه له‌و شوێنه وه‌ستا، ئێستاش كه ناتوانێت ئه‌م كاره بكات، بانگه‌شه بۆ ئه‌وه ده‌كات، “كه له‌ژێر فشاره‌كانی نه‌وه‌ی نوێ به‌نزین هه‌رزان ده‌بێت”.
هه‌روه‌ها شاسوار و نموونه‌كانی به كه‌سانی “نه‌خۆش” ناوبرد و گوتی: شاسوار تووشی ئه‌و په‌تایه بووه كه “خۆی به ده‌نگی گه‌ل” نیشان بدات.
له‌باره‌ی ئه‌و قه‌رزانه‌ی حكومه‌ت و هاووڵاتییانیش كه له‌سه‌ر شاسوار عه‌بدولواحیدن، جه‌مال عه‌بدوڵڵا جه‌ختی كرده‌وه، سه‌رۆكی ئێستای حكومه‌ت ئه‌و سه‌رۆكه نییه كه ساڵی 2011 به نرخێكی ره‌مزی لایه‌كی بناری ئه‌زمڕ و گۆیژه‌ی دایه شاسوار، سه‌رۆكی ئێستای حكومه‌ت به موزایه‌دات و چه‌واشه‌كاری قه‌رزی لێ ون ناكرێت و داناپۆشرێت، چونكه له وه‌زاره‌تی دارایی و ئه‌نجومه‌نی وه‌زیران به به‌ڵگه‌وه جێگیركراوه
K24