بەپێی ئەو زانیارییانەی دەست تۆڕی میدیایی باڵکێش کەوتوون، کۆماری ئیسلامی ئێران و حەشدی شەعبی، هەموو هەوڵەکانیان چڕ کردۆتەوە بۆ ئەوەی موسەنا ئەمین، کاندیدی یەکگرتووی ئیسلامی لە بازنەی سێی سنوری پارێزگای سلێمانی دەرنەچێت و پیاوان و لایەنگرانی خۆشیان ئاگادار کردۆتەوە کە دەنگ بە کاندیدێکی کۆمەڵی دادگەری بدەن.
باڵکێش زانیویەتی؛ هەریەکە لە کەتائیبی حەشدی شەعبی و حیزبوڵای عێراق، پیاوەکانی خۆیان لە سنووری سلێمانی و بازنەی سێ، هەروەها کۆماری ئیسلامیش بەهەمانشێوە پیاوەکانی خۆی راسپاردووە کە نابێ موسەنا ئەمین، دەنگی پێویست بەدەست بهێنێت و لە بەرامبەردا کار بۆ سەرخستنی ئەحمەد حەمە رەشید، کاندیدی کۆمەڵی دادگەری بکەن.
بازنەی سێی سلێمانی پێکهاتووە لە ( هەڵەبجە، شارەزوور، سەیدسادق، پێنجوێن)، بەپێی ئەمجامە نا فەرمییەکان، ئەنجامی دەنگدانی تایبەت بەم جۆرە بووە.
چرۆ شەریف ( هاوپەیمانی): 1896 دەنگ
ئەحمەد حاجی رەشید (كۆمەڵ): 585 دەنگ
ئەشواق جاف ( پارتی): 469 دەنگ
موسەنا ئەمین ( یەكگرتوو): 353 دەنگ
ئاریان تاوەگۆزی ( نەوەی نوێ): 174 دەنگ
موسەنا ئەمین، پەرلەمانتاری خولی سێیەم و چوارەمی یەکگرتوو لە پەرلەمانی عێراق، لە ساڵی 2017دا یەکێک بوو لە داکۆکیکارە سەرسەختەکانی ریفراندۆمی سەربەخۆیی کوردستان، هەروەها لە خولی چوارەمیشدا لەسەر ئاستی نوێنەرانی کوردستان، زۆرترین قسەی لە دانیشتنەکاندا کردووە.
ئێران و حەشدی شەعبی، بە هاوبەشی کار بۆ شکست پێ هێنانی ئەو کاندیدانە دەکەن کە نەتەوەیین و دەیانەوەی ئەو کەسانە بچنە پەرلەمان کە لە خۆیانەوە نزیکن.
ئەحمەدی حاجی ڕەشید، کە ئێستا ئێران و حەشد پاڵپشتی دەکەن، لە دوو خولی ڕابردودا کەمترین قسەی لە دانیشتنەکاندا کردووە و لە میدیاش زۆرترین قسەی دژی حکومەتی هەرێمی کوردستان کردووە. بەبێ ئەوەی هیچ هەڵوێستێکی دژی داگیرکارییەکانی حەشدی شەعبی، تۆپبارانەکانی ئێران و گەندەڵییەکان لە حکومەتی بەغدا هەبووبێ.