سه‌رۆكی حكوومه‌تی هه‌رێمی كوردستان، یه‌كه‌مین تلفریكی سنووری پارێزگای دهۆكی كرده‌وه، كه تلفریكی چیای زاوایه له‌و پارێزگایه و به پڕۆژه‌یه‌كی گرنگی گه‌شتیاری داده‌نرێت.
ئه‌مڕۆ یه‌كشه‌ممه 9/5/2021، مه‌سرور بارزانی، سه‌رۆكی حكوومه‌تی هه‌رێمی كوردستان، یه‌كه‌مین تلفریكی سنووری پارێزگای دهۆكی كرده‌وه و وتارێكى پێشكه‌ش كرد.
ده‌قى وتاره‌كه‌ى مه‌سرور بارزانى
به‌ناوی خوای مه‌زن و دلۆڤان
زۆر خۆشحاڵم كه له‌گه‌ڵ ئێوه به‌شدارم له كردنه‌وه‌ی ئه‌م پڕۆژه گریدنگه ستراتیژییه گه‌شتیاریبه‌ی له چیای زاوا له دهۆك.
ئه‌م پڕۆژه‌یه خزمه‌تی هه‌موو خه‌ڵكی كوردستان و ئه‌وانه‌ی سه‌ردانی كوردستانیش ده‌كه‌ن، ده‌كات، به‌رنامه‌ی ئێمه دوو به‌رنامه بوو، چاكسازى و هه‌مه‌جۆركردنی ئابووریی كوردستان.
پێمان خۆشه هه‌م حكوومه‌ت پڕۆژه‌ی گه‌شتیاری له‌گه‌ڵ به‌رنامه ئابوورییه‌كانی تری كوردستان، وه‌كوو پیشه‌سازی و كشتوكاڵ بكات، بۆ ئه‌وه‌ى سه‌رچاوه‌ی داهات له كوردستان زیاد بێ.
بۆ ئەوەی چاكسازی وەكوو خۆی جێبەجێ نەكەین زۆر ئاستەنگمان بۆ دروست دەكرێت، بەڵام هەموان دڵنیا دەكەینەوە كە لەسەر چاكسازی بەردەوام دەبین.
سوپاسی هه‌موو كۆمپانیاكانی كه‌رتی تایبه‌ت ده‌كه‌م، كه له پرۆژه‌كان به‌شدار بوون، سوپاسی كۆمپانیای یووبی هۆڵدینگ ده‌كه‌م، كه ئه‌م پڕۆژه جوانه‌ى لێره جێبه‌جێ كردووه.
هیوادارین كۆمپانیاكانى كه‌رتى تایبه‌ت به‌شدار بن و به‌رده‌وام بن له زیادكردنی پڕۆژه‌كانی كشتوكاڵ و گه‌شتوگوزاری و جێبه‌جێكردنی به‌رنامه‌كانمان له پێشخستنی ئابووریی كوردستان.
زۆر ئاسته‌نگیش بۆ ئێمه هاتووه‌ته پیش، به‌ڵام دڵنیاتان ده‌كه‌مه‌وه كه خوا و ئێوه پشتیوان بن، به‌رنامه‌ی چاكسازی جێبه‌جێ ده‌كه‌ین.
ڕاسته به‌رژه‌وه‌ندیی هه‌ندێ كه‌س له‌گه‌ڵ ئه‌نجامدانی چاكسازیدا نه‌بێ، به‌ڵام ئێمه چاوه‌ڕوانیی پشتیوانیی ئێوه‌ین بۆ ئه‌وه‌ه‌ی به‌رده‌وام بین له جێبه‌جێكردنی به‌رنامه‌ی چاكسازی.