شێرپەنجەی هونەر و کولتووری کوردی

هەتاكەی بەردەوام دەبێت؟
میدیای هونەری و سەرگەرمی، یان گاڵتەجاڕی و ….
ئەمڕۆ لە كوردستان، بە تایبەتی لە هەولێری پایتەخت، كۆمەڵێك دەزگەی میدیایی بە ناو قەبە و كەناڵی تەلەڤزیۆنی بێ پرەنسیپ دروست كراون، كە گوایە بۆ خزمەتكردنی هونەر و بەرزڕاگرتنی كلتوری ئەم میللەتە و بۆ سەرگەرمی و ئارامی و خۆشی بەخشین بە خانەوادەی كوردی دامەزراون، بەڵام وەك تێبینیی دەكەین و سەیر دەكەین، جگە لە شێواندنی هونەر و كلتور و شیرازەی كۆمەڵگە و خانەوادەی كوردی و بەلاڕێبردنی كچ و كوڕی ئەم هەرێمە، هیچی دیكەیان تێدا بەدی ناكرێ.
كۆمەڵێك خەڵك، كە تەنیا پارەیان پێیە، یان منداڵی بەرپرس و دەوڵەمەندە جێی گومانەكانن، یان بەرپرسێكی فاسدی سیاسی لە پشتیانەوەیە، رۆژانە كار لەسەر شێواندنی زەوق و میزاجی ئێمە دەكەن، لە پاڵ ئەوەدا ئەوانیش خەریكی دەستكەوتی ماددی و بەدەستهێنانی ئەو كەسانەن، كە خۆیان بۆ مەرامی خۆیان مەبەستیانن.
هەر لەو رێگەیەشەوە دەیان كەسی فاشیل و لەشفرۆشیان لێ كردووین بە هونەرمەند و مەیك ئاپ ئارتێست و مۆدێل و پێشكەشكار، بەڵام دیارە كە ئامانج و مەبەستەكە چییە و ئەوانەیان بۆ چی وا فوو تێكردووە.
ئەوەی لە هەمووی ناخۆشترە، لەو كۆمەڵە كەناڵانە، هەر چەند دەموچاوێك دەبینینەوە، خانم ئەمڕۆ لە كەناڵێك پێشكەشكارێكی نەخوێندەوارە، سبەی لە كەناڵێكی دیكە لە پرۆگرامێكی كۆمەڵایەتی بەشدارە، دووسبەی لە كەناڵێكی دی خواردن دروست دەكات و دەبێتە شێف، ئێوارەكەی لە كەناڵێكی دیكە باس لە مەیك ئاپ و فاشن دەكات، تەنانەت هەیانە بینیومە لە بەرنامەی تەندروستی و نەخۆشیی ژنانەش قسەی هەیە.
برادەرێكی تر، چونكە واستەی هەیە، پرۆگرامێكی لە كەناڵێك هەیە و گۆرانی دەڵێت، بڕیار وایە هونەرمەندان میوانداریی بكات، كەچی چەند جارێك بینیومە میوانەكانی گۆرانیبێژ نەبوون، ئەمەش بۆ ئەوەی خۆی بە تەنیا گۆرانی بڵێ و بەرنامەكە بۆ خۆی بەكار دێنێت و كەس نازانێت نەهجی بەرنامەكەی چییە، لە هەمووی خۆشتر، خۆی دوو سێ گۆرانی هەیە و تەنیا گۆرانی هونەرمەندانی دی دەڵێتەوە و جارجارەش بە میوانەكانی رادەبوێرێت، گوایە فشەكەرە.
جا لەو كەناڵانە، كە ئەو پێشكەشكار و ئامادەكارانە، زۆربەیان خەڵكی یەك شار و ناوچەیەكی دیاریكراون، ئیتر میوانەكانیشیان هەر خەڵك و خزم و دۆستەكانی خۆیانن و میوانەكان لەو كەناڵانە دووبارە و دە بارە دەبنەوە، ئەمڕۆ لە كەناڵێك لە پێشبڕكێی پرسیار بەشدارە، سبەی لە خواردن دروستكردن و دووسبەی لە گۆرانیگوتن و هەفتەی داهاتووش خەریكی مەیك ئاپ و جلوبەرگە، یان لە فشقیاتی چوارقۆڵی و قسەی قۆڕ دانیشتووە و قسەی زل دەكات و رەخنە لە كۆمەڵگە دەگرێت.
هەر بە رێگەی ئەو كەناڵانەوە، كە بەشێكی زۆریشیان بە درامای توركی، هیندی و كۆریایی كاتەكانیان پڕ دەكەنەوە و درامای كوردی بە دەگمەن دەبینین، خەڵكانێك كە تا دوێنێ خۆیان رەخنەیان لە داروبەرد دەگرت، كەچی ئێستا چوونەتە ریزەكەوە و بەرنامەیان هەیە و هەر ئەو كەسانە دەكەنە میوان، كە تا دوێنێ رەخنەیان لێدەگرتن، چ رووقایمن!
بەشێكی دی لە پۆخلەواتی ئەو كەناڵانە، خانمم دیوە دوێنێ بەرنامەی پیشكەش دەكرد، چونكە فاشیل بوو، دواتر بووە فاشن مۆدیل، لەوێش بازاڕی نەبوو، ئێستاش بووەتە گۆرانیبێژ، لە جیاتی گۆرانی ژنانە بڵێت، گۆرانی پیاوان دەڵێتەوە و چاوت جوانە لەیلا و كەژاڵ هەی كەژاڵم بۆ دەڵێ، خواش رەحمی كردووە دەنگی زۆر ناخۆشە، لەوانەیە لە ماوەیەكی دیكەی داهاتوودا لە مەجالێكی دیكە خۆی تاقی بكاتەوە، موهیم لە گۆڕەپانە پۆخڵەكە ئامادەیی هەبێت و داهات و ئیشەكەی! بەردەوام بێت.
كەناڵی تێدایە، چونكە ئێستا پارەیەكی زۆر قەرزارە و پارەی كارمەندەكانی نەداوە، ئێستا تەنیا دوو سێ پێشكەشكاری هەیە، ئامانجیشیان تەنیا ناساندنی لەشفرۆش و هەندێك لە میوانەكانی ئەودیوە، كاتێك دێنە ئێرە و دەیانەوێت ئیشیان دەستكەوێ!! لەو كەناڵەوە دەیانناسێن و هەر زوو پێشوازییان دەكەن.
هەر لەو كەناڵانە ئێستە دەستە و گرووپ پەیدابوونە و دوو دوو و سێ سێ پێكەوە دەردەكەون، یەكێك سوپەرە و ئەوی لەگەڵیدایە مەسینەهەڵگرە و ئەویتریشیان دەڵاڵە، ئیتر ئاقڵ تێدەگات چی دەڵێم.
راستییەكەی گۆڕەپانی ئەو كەناڵانە زیاتر بە مەبەستی تایبەت و بازرگانییەكی ناشەرعی ئاوەدانە و بەبێ بنەمایەكی هونەری و پرۆفێشناڵانە، بەبێ ئیتیك و ئەخلاقی رۆژنامەوانی و میدیایی و بەبێ پاراستنی ئادابی گشتی بەردەوامن و لەبەرەو پێشچووندان، چونكە قازانجە ماددییەكە و دەستكەوتە تایبەتەكانیش! لەو رێگەیەوە ئاسانترن و تۆڕەكە ئاسانتر، نێچیری خۆی راو دەكات.
ئێستە وای لێهاتووە، كەناڵی موعتەبەر و خاوەن پێشینەی میدیایی باش و تەنانەت ئۆرگانی و سیاسییش، خزاونەتە نێو ئەو گەمە ناشیرینە و لە رێگەی پرۆگرامی كروچوكاڵی هونەری و پێشبڕكێ و هێنانی هەندێك میدیاكاری بێ ئەزموون و خانمی سمت زل، دەیانەوێت بەشداری لە تێكدان و شێواندی شیرازە و ئادابی گشتیی كۆمەڵگەی كوردی و هەروەها هونەری كوردییش بكەن.
هەروەها خەڵكانێكیش كە لە گۆڕەپانەكە بە ناوی قەبەی هونەری، بەڵام بە موو نەرمی لە بواری پەیداكردنی ئافرەتدا پێشەنگن، بە زەبری پارە و پشت و خشت، شوێنی خۆیان لەو كەناڵانە دەكەنەوە و لە “سەرەوە” ئەمر دەكرێ بەرنامەیان پێ بدرێت و پرۆگرامە فاشیلەكانی خۆیان جێبەجێ بكەن و بە هەزاران دۆلاریان بۆ خەرج دەكرێ، بەبێ ئەوەی هیچ بەرهەمێكی ئەوتۆ پێشكەشی بینەر و كۆمەڵگە بكەن، لەگەڵ ئەوەی كە خەڵكیش لە دەموچاویان بێزارن و رەتیان دەكەنەوە، بەڵام ئەوان بە رووقایمی خۆیان بە پێكەنینێكی تاڵەوە بەردەوامن، بەڵام خۆ دیارە بەرهەمی ئەوان چییە و كێ رازی دەكەن و هەوڵی شكاندنی كێش دەدەن، هەر ئەو كەسە فاشیلانەش لە سۆشیال میدیا بە دەیان پەیجیان هەیە و رۆژانە دەهۆڵ بۆ خۆیان و بۆ وەجبەكانیان! دەكوتن و دەیانكەن بە سوپەرستاری فشۆڵ.
ئیتر قسەكردن لەسەر ئەو بارودۆخە نەخوازرا و تێكدراوە، زۆری دەوێت و تەواو نابێت، ئەو تێكدان و شێواندنی میزاج و بێ ئەخلاقكردن و بێ هیواكردنەی گەنج و لاوی كورد لە بەردەم هەندێك لەشفرۆشی خاوەن براندی درۆیین و جی كلاسی كوڕە مەسئولان بەردەوامە، بەبێ ئەوەی كەسێك، لایەنێكی بەرپرس و خاوەن دەسەڵات، لە كلتور و میدیا و رەوشتی ئەو میللەتە بێتە دەنگ و ئەم فەزایە شێواوە چاك بكات و ستۆپێكی پێ بكات.

ئەرسەلان عەبدوڵڵا