حەشدی شەعبی بۆ باڵکێش: 11چەکدار و 2ئەمیری داعشمان کوشت

هێزەکانی سەر بە وەزارتی ناوخۆ و بەرگریی عێراق بە هەماهەنگی حەشدی شەعبی ئۆپەراسیۆنێکیان بۆ راوەدوونان و کوشتنی چەکدارانی داعش لە سنووری پارێزگای دیالە دەستپێکردووە و تائێستا 13 چەکدار کوژراون کە دووانیان ئەمیرن.

سەید عەلی حوسێنی، وتەبێژی میحوەری باکووری حەشدی شەعبی بە تۆڕی میدیایی باڵکێشی راگەیاند، دوای کۆتایی هاتنی قۆناغی سێیەم، حەشدی شەعبی و هێزە عێراقییەکان دەستیان بە قۆناغی چوارەمی ئۆپەراسیۆنی گەڕان و پشکنین بەدوای چەکدارانی داعشدا کردووە کە سنووری دیالەی گرتۆتەوە و تا ئێستاش بەردەوامە و 13 چەکداری داعش کوژراون کە دووانیان ئەمیربوون.

ئەم ئۆپەراسیۆنە لەکاتێکدایە کە چوارشەممەی رابردوو لە ئۆپەراسیۆنێکی هەواڵگری عێراقدا بۆ سەر ویلایەتی بەغدادی داعش، سێ ئەمیر بە ناوەکانی عومەر شەلال قەرتانی، والی بەغدادی داعش، قیتال موهاجری، جێگری والی بەغداد ( سعودی ) و لەیس جەمال، بەرپرسی راگەیاندنی ویلایەتی بەغدادی داعش کوژران.