مەسرور بارزانی، سەرۆکی حکومەتی ھەرێمی کوردستان داوای لە پەرلەمانی کوردستان کردووە دانیشتنێکی تایبەت ڕێکبخات بۆ ئەوەی وتارێک پێشکەش بکات.
بەگوێرەی ڕاگەیەندراوێکی حکومەتی ھەرێمی کوردستان، وا بڕیارە پەرلەمانی کوردستان دانیشتنێکی تایبەت لەسەر داوای مەسرور بارزانی، سەرۆکی حکومەتی ھەرێمی کوردستان ڕێکبخات.
دەقی ڕاگەیەندراوەکە:
بڕیارە لە چەند ڕۆژی داهاتوودا، لە سەر داوای مەسرور بارزانی سەرۆکی حکومەتی هەرێمی کوردستان، پەرلەمانی کوردستان دانیشتنێکی تایبەت ڕێکبخات کە تێیدا سەرۆکی حکومەت لە سەر جێبەجێکردنی كارنامەی چاکسازیی کابینەی نۆیەم و ڕێڕەوی گفتوگۆکان لە گەڵ حکومەتی فیدراڵی و شیکردنەوەی دۆخی دارایی و تەندروستی ئێستای هەرێمی کوردستان و لێکەوتەکانی تەشەنەکردنی ڤایرۆسی کۆرۆنا، گوتارێک پێشکەش دەکات.
بە پێی ماددەی 66 بڕگەی دووەم لە پەیڕەوی ناوخۆی پەرلەمانی کوردستان ، سەرۆک وەزیران دەتوانێت داوا دانیشتنی پەرلەمان بکات بۆ ئەوەی ڕوونکردنەوە لە سەر بابەتێک بدات و دەستەی سەرۆکایەتی پەرلەمانی کوردستانیش دەبێ لە ماوەیەکدا کە لە 14 ڕۆژ تێپەڕ نەکات ئەو دانیشتنە ڕێک بخات.