سێ برازای هادی عامری لە رووداوێکدا گیانیان لەدەستدا

بەیانی ئەمڕۆ شەممە 4-9-2021  لە رووداوێکدا لە شاری بەغدا سێ برازای هادی عامری، سەرۆکی هاوپەیمانیی فەتح گیانیان لەدەستدا.

کاتژمێر 6ی بەیانی ئەمڕۆ شەممە لە شوقەکانی ئەبونەواس لە شەقامی ئەبو نەواس لە ناوچەی جادرییەی شاری بەغدا رووداوێکی ئاگرکەوتنەوە روویدا و بەهۆیەوە سێ برازای هادی عامری گیانیان لەدەستدا و یەکێکی دیکەش برینداربوو. 

 باوکی منداڵەکان حافز عامر، برای هادی عامرییە، منداڵەکانیش تەمەنیان 6 ساڵ، 10 ساڵ و 13 ساڵ بووە و یەکەم و دووەم کوڕ بوون و سێیەمیشیان کچ بووە. ئەوەشیان کە رەوانەی نەخۆشخانە کراوە تەندروستیی باش نییە. 

شایەتحاڵێک لە شوێنی رووداوەکە بە رووداوی گوتووە، ئاگرەکە بەهۆی شۆرتی کارەباوە بووە کە لە نهۆمی دووەم کەوتووەتەوە.

بە گوتەی شایەتحاڵێک منداڵەکە نەسووتاون، بەڵکو بەهۆی دووکەڵی ئاگرەکەوە خنکاون.