حکومەتی هەرێمی کوردستان لەڕێگەی دامەزراندنی “بانکی نیشتمان”ـەوە، وەرچەرخانێکی گەورە لە سیستەمی دارایی و بانکیی خۆیدا ڕادەگەیەنێت. ئەم بانکە کە پرۆژەیەکی ستراتیژیی مەسرور بارزانی، سەرۆکوەزیرانی هەرێمی کوردستانە، وەک بەشێکی گرنگ لە پرۆسەی بەدیجیتاڵیکردنی کارەکانی حکومەت و بنبڕکردنی گەندەڵی هەژمار دەکرێت.
پێگەی یاسایی و کارگێڕی بانکەکە
بانکی نیشتمان دەبێتە یەکەم بانکی فەرمیی حکومەتی هەرێمی کوردستان کە خاوەنی مۆڵەتی فەرمی بێت لە بانکی ناوەندیی عێراق. بڕیارە هەفتەی داهاتوودا بانکەکە یەکەم کۆبوونەوەی فەرمیی خۆی بکات، بە کردەیی دەست بە کارەکانی بکات، دوای ئەوەی تەواوی باڵەخانە و پێداویستییە تەکنیکییەکانی بۆ دابین کراوە.
ڕێکخستنەوەی بانکە حکومییەکان و کەمکردنەوەی ژمارەیان
ئەم بانکە دەبێتە چەترێک بۆ کۆکردنەوە و ڕێکخستنەوەی هەموو بانکە حکومییەکانی هەرێمی کوردستان. بەپێی پلانەکە، گۆڕانکارییەکان بەم شێوەیەن:
بانکە پسپۆڕییەکان: 28 بانکی کشتوکاڵی و بازرگانی و پسپۆڕییەکانی تر، کەم دەکرێنەوە و تێکەڵ دەکرێنە هەشت بانک.
بانکە حکومییەکان: 94 بانکی حکومی لە سەرتاسەری هەرێمی کوردستان تێکەڵ دەکرێن و دەکرێنە نزیکەی 17 بانک.
سیستەمی لقەکان: هەموو ئەم بانکانە سەر بە بانکی نیشتمان دەبن، بەسەر تەواوی پارێزگاکا و ئیدارە سەربەخۆکاندا دابەش دەکرێن.
وەرچەرخانی دیجیتاڵی و سیستەمی بەڕێوەبردن
یەکێک لە خاڵە هەرە دیارەکانی ئەم بانکە ئەوەیە بە تەواوی دیجیتاڵییە. سیستەمی بەڕێوەبردنی بە شێوەیەکی ئەلیکترۆنییە، دەبێتە هۆی ئەوەی هەموو مامەڵەکان خێراتر و وردتر بن. ئەم هەنگاوە لە چوارچێوەی پلانی حکومەتدایە بۆ ئەوەی تەواوی خزمەتگوزارییە داراییەکان بگۆڕدرێن بۆ سیستەمی پێشکەوتووی سەردەمیانە.
شەفافییەت و بەرەنگاربوونەوەی گەندەڵی
دامەزراندنی ئەم بانکە وەک ئامرازێکی بەهێز بۆ شەفافییەت تەماشا دەکرێت. گرنگترین کاریگەرییەکانی لەم ڕووەوە بریتین لە:
کۆکردنەوەی داهات و خەرجی: بانکەکە سەرپەرشتی تەواوی داهات و خەرجییەکانی حکومەت دەکات، لە کۆتایی هەموو مانگێکدا ڕاپۆرتێکی ورد پێشکەشی ئەنجوومەنی وەزیران دەکات.
بنبڕکردنی گەندەڵی: بەهۆی ئەوەی کارەکان ئەلیکترۆنی و لەژێر چاودێریدان، دەرفەتی گەندەڵی، دزی و ونبوونی پارە بۆ کەمترین ئاست دادەبەزێت.
بانکی نیشتمان نەک تەنها دەبێتە ناوەندێکی دارایی فەرمی بۆ مامەڵەکردن لەگەڵ بەغدا و جیهان، بەڵکو دەبێتە پایەیەکی سەرەکی بۆ چاکسازیی ئابووری لە هەرێمی کوردستان، کە تێیدا سیستەمی بانکی لە شێوازی کلاسیکییەوە دەگۆڕێت بۆ سیستەمێکی شەفاف، مۆدێرن و یەکگرتوو.
باکگراوند: بانکی نیشتمان لە ساڵی 2021 دەستی بە وەرگرتنی مۆڵەت کرد لە بانکی ناوەندیی عێراق، لەم چوارچێوەیەدا کەوتە ئامادەکاری بۆ بونیادنانی بانکەکە و بەم زووانە دەست بە کارەکانی دەکات.