دەزگای خێرخوازیی بارزانی، بەبۆنەی دەستنیشانکردنی وەکو کۆمیسیاری باڵای کاروباری پەنابەران لەلایەن نەتەوە یەکگرتووەکانەوە پیرۆزبایی لە د. بەرهەم ساڵح دەکات.
دەقی پەیامەکەی دەزگای خێرخوازیی بارزانی:
ئێمە لە دەزگای خێرخوازیی بارزانی، کە ئەندامی ئەنجومەنی ئابووری و کۆمەڵایەتی نەتەوەیەکگرتووەکانین (ECOSOC)، بە گرنگییەوە دەڕوانینە ئەو هەنگاوە و ئومێدەوارین لە داهاتوو، هاوکار و پشتیوان بێت بۆ باشترکردنی رەوش و گوزەرانی پەنابەران لە هەرێمی کوردستان و عێراق و ناوچەکە، بەتایبەتیش کە ئێستا هاوکاریی رێکخراوە نێودەوڵەتییەکان بۆ پەنابەران کەمیکردووە.
لەکاتێکدا بە گەرمی پیرۆزبایی لە بەرهەم ساڵح دەکەین، وەبیر هەموو لایەک دەهێنینەوە، تا ئێستاش نزیکەی 700 هەزار ئاوارە و پەنابەر لە هەرێمی کوردستان دەژین، کە پتر لە 280 هەزاریان پەنابەرن، ئەمەش ئەرکی گەل و حکومەتی هەرێمی کوردستانی قورستر کردووە، ئومێدەوارین بتوانین لە پێناو باشترکردنی رەوشی پەنابەران بە یەکەوە کار بکەین، بەتایبەتیش بەڕێزیان لە رابردوو سەرۆک کۆماری عێراق بووە و تێگەیشتنی بۆ گرفت و نەهامەتییەکانی پەنابەران هەیە.