هۆشداری دەدرێتە خواردنگە و ریستۆرانتەکانی سلێمانی
لەپێناو پاراستنی تەندروستی گشتی و سنوردارکردنی حاڵەتەکانی سکچون و رشانەوە، لیژنە هاوبەشەکانی قائیمقامیەتی سلێمانی لەبارەی بەکارهێنانی سەوزە و دۆ و پیاڵەی شوشەوە سەرجەم خواردنگەو چایخانەو ریستورانتەکانی سلێمانی ئاگادار دەکاتەوە.
رێکان جەمال- سەرۆکی لیژنە هاوبەشەکانی قائیمقامیەتی سلێمانی رایگەیاند: بەرێوبەرایەتی خۆپاراستنی تەندروستی داوای لێکردوون بەهۆی زۆربوونی حاڵەتەکانی سکچون و رشانەوەوە رێکاری پێویست بگرنەبەر بۆئەوەی کۆنترۆڵی ئەو پەتایە بکرێت، هەربۆیە بە فەرمانی قائیمقامی سلێمانی هەموو هەوڵێکمان خستووەتەگەڕ و لە قۆناغی یەکەمدا بەشی زۆری ئەو شەمعەو بیرانەمان داخست کە ئاوەکانیان بۆخواردنەوە شیاو نەبوون.
لەبارەی رێکارەکان لەناو چێشتخانەکاندا وتی: لێرەوە هەموو چێشتخانەو خواردنگەو چایخانەیەک ئاگادار دەکەینەوە کە بەهیچ جۆرێک نابێت سەوزە بە هەموو جۆرەکانییەوەو دۆی کراوە(دروستکراو) و پیاڵەی شوشە بۆ چا بەکاربهێنن، لە سبەینێوە هەر شوێنێک پابەندی ئەو رێنماییانە نەبێت رێکاری توند هەتا داخستنی لەگەڵدا دەگرینە بەر.
لەکاتی هەبونی گومان یان بۆ گەیاندنی سکاڵا و زانیاری بەقائیمقامیەتی سلێمانی و لیژنە هاوبەشەکان، پەیوەندی بە ژمارە مۆبایلی (07708677777)ـەوە یان لاپەڕەی فەرمی قائیمقامیەت لە تۆڕی کۆمەڵایەتی فەیسبووک بکەن.
راگەیاندنی قائیمقامیەتی سلێمانی