نێچیرڤان بارزانی له رێوڕه‌سمی پێشوازیكردن له ته‌رمی عه‌لی قازی كوڕی پێشه‌وا قازی محه‌مه‌د، هه‌وڵه‌كانی خوالێخۆشبوو عه‌لی قازیی له پێناو یه‌كڕیزی گه‌لی كوردی به‌رز نرخاند و گوتی، تا كۆتایی ژیانی هه‌ر به دوای ته‌بایی و یه‌كڕیزیی گه‌له‌كه‌ی بوو.
ئه‌مڕۆ دووشه‌م 18ی ته‌مووز، به ئاماده‌بوونی نێچیرڤان بارزانی سه‌رۆكی هه‌رێمی كوردستان، ژماره‌یه‌ك له به‌رپرسانی حكوومه‌ت و نوێنه‌رانی پارت و لایه‌نه كوردستانییه‌كان و بنه‌ماڵه‌ی قازی، له فڕۆكه‌خانه‌ی نێوده‌وڵه‌تیی هه‌ولێر، ڕێوڕه‌سمی پێشوازیكردن له ته‌رمی خوالێخۆشبوو عه‌لی قازی كوڕی پێشه‌وا قازی محه‌مه‌د به‌ڕێوه چوو.
نێچیرڤان بارزانی له‌و رێوڕه‌سمه‌دا وتارێكی پێشكه‌ش كرد و وێڕای ده‌ربڕینی پرسه و سه‌ره‌خۆشی، باسی له‌وه كرد كه عه‌لی قازی تا له ژیاندا مابوو، زۆر به دڵسۆزی و به په‌رۆشه‌وه داوای یه‌كڕیزی و ته‌بایی گه‌له‌كه‌ی ده‌كرد. هه‌رگیز له خه‌می گه‌ل و وڵاته‌كه‌ی دوور نه‌ده‌كه‌وت.
سه‌رۆكی هه‌رێمی كوردستان له به‌شێكی تری وتاره‌كه‌یدا تیشكی خسته سه‌ر خه‌باتی بنه‌ماڵه‌ی قازی محه‌مه‌د له مێژووی بزووتنه‌وه‌ی رزگاریخوازانه‌ی گه‌لی كورد و ئاماژه‌ی دا، قازی محه‌مه‌د له قۆناغێكی سه‌ختدا رابه‌رایه‌تی گه‌له‌كه‌ی كردووه و له پێناویدا گیانی خۆی به‌خت كردووه.
پێویسته بگوترێ ته‌رمی عه‌لی قازی له دوای ئه‌و رێوڕه‌سمه، به‌ره‌و كه‌لار به‌ڕێ ده‌كرێت و بڕیاره له‌وێ له ته‌نیشت خوشكه‌كه‌ی به خاك بسپێرێت.
ده‌قی وتاری سه‌رۆكی هه‌رێمی كوردستان:
ئاماده‌بووانی به‌ڕێز
ڕۆژتان باش
ئه‌مڕۆ هه‌موومان پێكه‌وه له‌م ڕێوڕه‌سمه ماته‌مینه‌دا به‌شدارین، تاكو به ڕێز و شكۆوه پێشوازی له ته‌رمی خوالێخۆشبوو عه‌لی قازی، كوڕی پێشه‌وا قازی محه‌مه‌دی نه‌مر بكه‌ین.
خوالێخۆشبوو عه‌لی قازی، كوڕی ڕه‌ش، له‌به‌ر مێژوو و پێگه‌ی بنه‌ماڵه‌كه‌ی، له‌به‌ر ئه‌وه‌ی یادگاری پێشه‌وا قازی محه‌مه‌دی نه‌مر بوو، به درێژایی ته‌مه‌نی خۆی، ناچار بووه به‌رگه‌ی زۆر سه‌ختی و زه‌حمه‌تی و په‌نابه‌ری و دووره‌وڵاتی و ئازاره‌كانی بگرێت. هه‌میشه له خه‌می یه‌كڕیزی و ته‌بایی و یه‌كێتیی گه‌له‌كه‌یدا بووه. تا دوایین هه‌ناسه‌ش كه له سه‌ره‌مه‌رگدا بوو، وه‌ك له‌سه‌ر شاشه‌ی ته‌له‌ڤزیۆن بینیمان، زۆر به دڵسۆزی و به په‌رۆشه‌وه داوای یه‌كڕیزی و ته‌بایی گه‌له‌كه‌ی ده‌كرد. هه‌رگیز له خه‌می گه‌ل و وڵاته‌كه‌ی دوورنه‌ده‌كه‌وت. له هه‌ر كوێ ده‌رفه‌تی هه‌بووایه، به دوای ته‌بایی و یه‌كڕیزیی گه‌له‌كه‌ی بوو. ئه‌مه‌یشی له پێشه‌وا قازیی باوكییه‌وه بۆی مابووه‌وه. پێشه‌وای نه‌مریش تا دوایین وه‌سیه‌تیشی هه‌ر ئه‌وه بوو كه یه‌كڕیزی و یه‌كگرتوویی و ته‌باییی گه‌له‌كه‌ی داوا ده‌كرد.
ئاماده‌بووانی به‌ڕێز
ئه‌مڕۆ كه هه‌موومان پێكه‌وه لێره‌ین، بۆ ئه‌وه‌یه ڕێز له پێگه و خه‌بات و تێكۆشانی پێشه‌وا قازی و بنه‌ماڵه به‌ڕێزه‌كه‌یان و قوربانیدانیان له‌پێناو گه‌ل و له‌پێناو وڵاته‌كه‌یاندا به‌رز بنرخێنین. پێشه‌وا له‌پێناو ماف و ژیانێكی شایسته و باشتر بۆ گه‌له‌كه‌ی، له‌پێناو كۆتاییهێنان به نكۆڵیكاری و چه‌وسانه‌وه، له قۆناغێكی یه‌كجار دژواردا ڕابه‌رایه‌تیی میلله‌ته‌كه‌ی كرد، دواجاریش مه‌ردانه چووه به‌ر په‌تی سێداره و هه‌ر له‌و پێناوه‌دا گیانی خۆی به‌خشی.
پێشه‌وا به‌و قوربانیدانه‌ی، بووه سیمبۆلێكی زیندووی خۆبه‌ختكردن له مێژووی گه‌لی كوردستاندا و بووه به‌شێك له یاده‌وه‌ریی هه‌میشه زیندووی نه‌وه‌ی دوای خۆی.
ئێمه كاتێ له ڕێوره‌سمی ماڵئاوایی له كوڕ و یادگاری ئه‌و سه‌ركرده نه‌مره‌دا وه‌ستاوین، مێژووی پر شانازیی كۆماری كوردستان و به‌ها به‌رزه‌كانی هاوبه‌شیی نه‌ته‌وه‌یی و به‌هاناوه‌چوونی بارزانییه‌كان و تێكۆشه‌رانی دیكه، بۆ داكۆكیكردن له كۆمار و داستانی په‌ڕینه‌وه له چه‌می ئاراس دێنینه‌وه یاد. له كاتێكدا به ڕێز و شكۆوه له خه‌باتی پێشه‌وا قازی و بارزانیی نه‌مر و هاوسه‌نگه‌ره‌كانیان ده‌ڕوانین، هه‌موو ئه‌و سه‌ركرده و تێكۆشه‌ر و خه‌باتكارانه‌مان دێته‌وه یاد كه به درێژاییی زیاتر له سه‌د ساڵ، به هه‌ر ڕێگه و به هه‌ر شێوه‌یه‌ك بۆیان كرابێت، خه‌باتیان كردووه بۆ به‌ده‌ستهێنانی مافی گه‌له‌كه‌یان و بوونه قوتابخانه و ڕێنیشانده‌ر و هه‌وێنی درێژه‌پێدانی تێكۆشانی نه‌وه‌ی داهاتووی دوای خۆیان.
مێژووی گه‌لی كوردستان، مێژووی هه‌وڵ و تێكۆشانی میلله‌تێكه كه ویستوویه‌تی و ده‌یه‌وێت دوور له غه‌در و پێشێلكردنی ماف، له سایه‌ی دانپێدانانی مافه ڕه‌واكانیدا، به ئاشتی و برایه‌تی، پێكه‌وه له‌گه‌ڵ میلله‌ت و گه‌لانی برا و هاونیشتمان و هاوچاره‌نووسیدا بژیت. گه‌لێك، هه‌میشه ویستوویه‌تی كێشه‌یه‌كه‌ی سیاسییانه، به ئاشتی و لێكگه‌یشتن و دوور له شه‌ڕ و كاولكاری چاره‌سه‌ری بۆ بدۆزێته‌وه.
گه‌لێك، ویستویه‌تی و ده‌یه‌وێت وه‌ك گه‌لێكی گه‌وره‌ی ناوچه‌كه، پێگه‌ی زه‌وتكراوی خۆی وه‌ربگرێته‌وه و مافه‌كانی بسه‌لمێنرێن، تا بتوانێت ببێته هاوبه‌ش و فاكته‌رێكی به‌هێزی ئاشته‌وایی و سه‌قامگیری و پێشكه‌وتن كه خزمه‌ت به كۆی میلله‌تانی ناوچه‌كه بكات. ئه‌و ناوچه‌یه‌ی به ده‌ست شه‌ڕ و ناسه‌قامگیری و ململانێی بێ كۆتاییه‌وه، زۆری چه‌شتووه و زۆر ده‌رفه‌تیش له ده‌ست ڕۆیشتووه. ئێستاشی له‌گه‌ڵ بێت په‌یامی گه‌لی كوردستان هه‌ر ئه‌و په‌یامه‌یه و ئه‌وه ته‌نیا و ته‌نیا په‌یامی ئاشتی و چاره‌سه‌ری ئاشتییانه و خواستی پێكه‌وه‌ژیانی برایانه‌یه له‌گه‌ڵ هاونیشتمانییه‌كانمان و گه‌لانی برامان له ناوچه‌كه‌دا.
ئاماده‌بووانی به‌ڕێز.
میلله‌تانی زیندوو هه‌میشه نرخی ڕه‌نج و ماندووبوونی تێكۆشه‌رانیان ده‌گرن. به چاوی وه‌فا و ڕێز له قوربانیدانیان ده‌ڕوانن و یاد و یادگاریان به زیندوویی و به به‌رزی ڕاده‌گرن. زۆر پێویسته ئه‌م كولتووره له‌ناویه گه‌لی ئێمه‌دا به زیندوویی بمێنێته‌وه، پێویسته به‌رده‌وام نه‌وه‌ی ئێستا و نه‌وه‌ی داهاتووش ڕێز له خه‌بات و ماندووبوونی ئه‌و سه‌ركردانه بگرێت كه له‌پێناو ملله‌تی خۆیاندا خه‌باتیان كردووه و تێكۆشاون و كۆڵیان نه‌داوه.
كۆبوونه‌وه‌مان ئه‌مڕۆ بۆ پێشوازی له ته‌رمی كوڕی ڕه‌ش، ئه‌و وه‌فاداری و ئه‌ركه پیرۆزه‌یه كه لێمان چاوه‌ڕوان ده‌كرێت. ته‌رمی به‌ڕێز عه‌لی قازی تاقانه‌كه‌ی پێشه‌وامان به‌ڕێزه‌وه هێنایه‌وه كوردستان، هه‌ر به ڕێزیشه‌وه له باوه‌شی وڵاتدا ده‌نێژرێت. ده‌بێ وا بێت و ئه‌مه‌ش مافی خۆی و بنه‌ماڵه‌كه‌یه‌تی، هه‌روه‌ها ئه‌ركی ئێمه‌یه كه ڕێز له‌و بنمه‌ماڵه‌یه بگرین.
له دوای شه‌هیدبوونی پیشه‌وا قازی، عه‌لی قازیی كۆچكردوو، عه‌وداڵی وڵات بوو، هه‌ر له‌و پێناوه‌شدا زۆر ده‌ربه‌ده‌ری و ماندووبوونی بۆ وڵاته‌كه‌ی بینی و له كۆتاییدا هاته‌وه ناو باوه‌شی وڵاته‌كه‌ی. به خێر بێیته‌وه و ئارام بنوێت كوڕه‌كه‌ی پێشه‌وامان. سڵاو له گیانی پاكی كاكه عه‌لی و دروود بۆ یادی پێشه‌وای نه‌مر و شه‌هیدانی بنه‌ماڵه‌ی خانه‌دان و كوردستانپه‌روه‌ری قازییه‌كان و سه‌رجه‌م شه‌هیدان و تێكۆشه‌رانی كوردستان.
پرسه و سه‌ره‌خۆشیی دووباره‌مان له بنه‌ماڵه به‌ڕێزه‌كه‌یان و خزم و كه‌سوكار و هه‌موو كوردستانییانی خۆشه‌ویست. یادی كاكه عه‌لی هه‌میشه به خێر و ئێوه‌ش هه‌موو لایه‌كتان به‌خێر بێن بۆ ئه‌و ڕێوڕه‌سمه.