ئەمڕۆ شەممە 18ی حوزەیران، بە ئامادەبوونی مەسرور بارزانی سەرۆکی حکومەتی هەرێمی کوردستان، ئاهەنگی دەرچوونی هەردوو خولی 25 و 26 ی قوتابییانی زانکۆی دهۆک بەڕێوەدەچوو.
سەرۆکی حکومەت لە گوتارێکدا ئاماژەی بەوەدا کە گەنج و قوتابییانی کوردستان پێویستە هەوڵی کاری داهێنەرانە بدەن بۆ ئەوەی دەرفەتی کار بۆ خۆیان و گەنجانی دیکەی کوردستان دابین بکەن و کوردستان بەرەوپێشەوە ببەن. دڵنیاشی کردنەوە کە حکومەتی هەرێمی کوردستان هەموو پشتیوانییەکی کاری داهێنەرانە دەکات.
ئەمەش دەقی گوتاری سەرۆکی حکومەتی هەرێمی کوردستانە:
بناڤێ خودێ مەزن و دلۆڤان
جات و سەرۆک و ماموستایێن زانکۆیا دهۆکێ
قوتابیێن دەرچوویی یێن خۆشتەڤی یێن گەڕا 25 و 26
کەس و کارێن قوتابییان
ئەمادەبوو یێن بەرێز و قەدرگران
ئەز گەلەک خۆشحالم ئەڤرۆ ل گەل هنگۆ ل باژێڕێ دهۆکێ، ل ڤێ ئاهەنگێ یێ پشکدارم، پیرۆزباهییەکا گەرم ل قوتابیێن دەرچووییێن خۆشتەڤی دکەم هیڤییا سەرکەفتنێ و ئۆمێدا پاشەرۆژەکا گەش بۆ هنگۆ دخازم ل ئەڤرۆ و ل کارێ هنگۆ یێ داهاتی، دەستخۆشیێ ل دایک و باب و کەس و کارێن هنگۆ دکەم، کۆ گەلەک خۆ ب هنگۆڤە ماندی کری بۆ هندێ دا کوڕ وکچێت وان پێ چێببن ڤێ قویناغا خوەندنێ دژیانا خودا ب سەرکەفتی تەمام بکەن.
من سوپاسی و حورمەت بۆ ماموستایان هەیە، کۆ ئەرکێ خۆ ل پێگەهاندن و وانەگۆتنێ، هەمبەر قوتابیێن خۆشتەڤی ئەنجام دایە. هیڤیدارم دسەرکەفتی بن ل پەیاما خۆ یا گرنگ کۆ پەیاما فێرکرن و پەروەردەکرنا نڤشێن مە یێ نوییە.
لێرەدا د جهێ خودایە سوپاس و پێزانینێت خوە بگەهینینە پێشمەرگە و هێزێن پۆلیس و ئاسایشێ کو ئەڤ کەش و ئاسایش و ئارامییە ل کوردستانێ دروست کریە داکو ئەم پێ چێ ببین ڤان جۆرە ئاهەنگا بگێڕین. دهەمان دەمیدا سەرێ ڕێز و پێزانینێ بۆ شەهید و کەسوکارێت شەهیدا بچەمینین کۆ ب سەرێ زەحمەت و خوینا شەهیدا ئەڤرۆ ئەم لێرە ڤێ ئاهەنگێ دگێڕین .
زانکۆیا دهۆکێ، ئێکە ژ زانکۆیێن مەزن و سەرەکی یێن هەرێما کوردستانێ، کۆ هەر ل ساڵا 1992ێ وەرە، خزمەتەکا زۆر ب خەلکێ دهۆکێ و دەڤەرا بادینان و هەرێما کوردستانێ ب گشتی گەهاندییە. ساڵا نۆهەد و دوێ ، پێشی کۆ زانکۆ بهێتە دامەزراندن ، د.عیسمەت هاتە نیک جەنابێ سەرۆکێ و داخاز لێکر کو زانکۆیا دهۆکێ بهێتە دامەزراندن ئەگەر پشتەڤانی لێ بهێتە کرن. جەنابێ سەرۆکیش ب هەمی هێز و توانایی و پشتەڤانیا پێتڤی بۆ ڤێ زانکۆیێ دەستەبەر کر و ئەڤ زانکۆیە ل سەر دەستێ جەنابێ سەرۆکی هاتە دامەزراندن. ل ڤێ رۆژێ هەتا ئەڤرۆ ئەڤ زانکۆیە، ب هزاران گەنج و لاو یێن پێگەهاندین، کۆ ئەڤرۆ ل بوارێن جوداجودا یێن هەرێما کوردستانێ خزمەتێ دکەن. هەروەتۆڤ پەیوەندییەکا باش، ل گەل ناڤەندێن ئەکادیمی یێن ناڤچەیێ و جیهانێ یا هەی. هیڤیدارم زانکۆیا دهۆکێ، ل ئەرک و پەیاما خۆ یا ئەکادیمی، یا سەرکەفتی بیت و پێشڤە بچیت و پتر پێشکەفتنێ ب ئاستێ زانسی یێ خۆ بدەت.
حکومەتا هەرێما کوردستانێ، گرنگی و پویتەکێ زۆر ب پرۆسەیا خاندن و پەروەردێ ددەت. ئێک ژ لایێن سەرەکی یێن پرۆسەیا چاکسازییا کابینەیا نەهێ یا حکومەتا هەرێما کوردستانێ، کەرتێ پەروەردێ و خاندنێ یە، کۆ پشکەکا گرنگ و سەرەکی یا ڤێ چاکسازیێ پێک دئینیت، چونکی مە دڤێت سیستەمێ پەروەردێ و خاندنا بلندا مە ب ئاستەکی بەرەف پێشڤە ببەین، کۆ یێ گونجایی بیت ل گەل پێشکەفتنا بێ سنوور یا زانست و تەکنەلۆجیا ڤی سەردەمی. ئارمانجا مە ئەوە، قوتابیێن کوردستانێ، فێری وێ بسپۆری و شەهرەزایێ ببن کۆ بۆ بازاڕ و پێشکەفتن و وەرار و پێشڤەچوونا کوردستانێ پێتڤی یە، داکۆ ببنە پشتەڤانەکێ ب هێز بۆ پێشڤەچوونا ئابووری یا وەڵاتی مە. هەروەتۆڤ ئەم ب رێکا پەروەردەیەکا دروست و پێشکەفتی، دێ پێ وەستین نڤشەکێ هشیار و تێگەهشتی دروست بکەین و جڤاکەکێ ساخلەم ئاڤا بکەین، جڤاکەک، کۆ مرۆڤەکێ نیشتیمانپەروەر و زانستپەروەر بۆ مە دروست بکەت، چونکی دڤێت ئارمانجا سەرەکی یا خاندنێ، بتنێ ب دەستڤەئینان باوەڕنامێ نەبیت، بەلکۆ بلندکرنا ئاستێ رەوشەنبیری و هشیاریێ و پێشڤەبرن و خزمەتکرنا جڤاکی بیت.
وەکوو پشکەک ژ پرۆسەیا چاکسازیێ ل کەرتێ پەروەردێ و فێرکرنێ، مە دەستەیەک بۆ هەلسەنگاندن و باوەڕی پێدانێ ب دام و دەزگەهێن ئەکادیمی پێک ئینایە بناڤێ (دەستەیا باوەڕی پێدانێ ب دامەزراوە و پرۆگرامێن پەروەردێ و خاندنا بلند ل هەرێما کوردستانێ) کو نۆکە ئەڤ پرۆژە یاسایە، ل پەرلەمانی کوردستانێ یە و خاندنا دویێ ژی بۆ هاتییە کرن. ئارمانج ل ڤێ دەستەیێ، بلندکرنا ئاستێ زانستی و ئەکادیمی یێ دامەزراوە و پرۆگرامێن پەروەردێ و خاندنا باڵا و دەستەبەرکرنا کوالیتییا خاندنێ یە ل هەرێما کوردستانێ ب گۆرەی ستاندارێن نێڤدەولەتی. هیڤیدارم زانکۆ و ناڤەندێن ئەکادیمی ل هەرێما کوردستانێ، بەردەوام د بەریکانەیێن زانستیدا بن بۆ بلندکرنا ئاستێ زانکۆیێ و کوالیتییا خاندنێ.
مامۆستایێن بەرێز
قوتابیێن خۆشتەڤی
پێتڤییە نیشتیمانپەروەری و خۆش ڤیانا وەڵاتی، ئێک ژ ئارمانجێن سەرەکی یێن پروسەیا خاندن و پەروەردێ بیت. دڤێت قوتابیێن مە لسەر نیشتیمانپەروەریێ و مرۆڤدۆستیێ و رێزگرتنێ ل یێ بەرامبەر و لێخۆشبوونێ و پێکڤەژیانێ بهێنە پەروەردە کرن. چونکی مە پێتڤی ب ڤی جۆرێ گەنجا هەیە، داکۆ پشتی تەمامکرنا خواندنێ، بشێن مفای بگەهینیتە جڤاکا خۆ و ببیتە فاکتەرەکێ ب هێز بۆ پێشڤەبرنا جڤاكا خۆ و وڵاتێ خۆ.
ئه‌م هه‌می دزانین كو هه‌وڵه‌كا زۆر دهێته دان بۆ هه‌ندێ پێشكه‌فتن و ئاڤه‌دانكرنا كوردستانێ بهێته راوه‌ستاندن، خه‌ڵكه‌كی زۆر یێ هه‌ی چاڤ ب پێشكه‌فتن و سه‌ركه‌فتنا كوردستان هه‌ڵناهێت، ل به‌ر هه‌ندێ هه‌می هه‌وڵه‌كێ دێ ده‌ن بۆ هندێ كو هه‌م هنگو بێ هیڤی و بێ ئومێد بكه‌ن و هه‌م وه‌ڵاتێ هنگو لبه‌ر دلێ هنگو ره‌ش بكه‌ن.
داخازا من و هیڤیا من ل هنگو ئه‌وه، هنگ وه‌ڵامێ ب خۆڕاگریا خۆ بده‌نه‌ڤه، ب وێ چه‌ندێ بده‌نه‌ڤه كو هنگ خودانێت ڤی وه‌ڵاتینه و دێ هنگ ب ده‌ستێت خو ڤی وه‌ڵاتی ئاڤه‌دان كه‌ن و پێشڤه‌به‌ن، كه‌س ناهێت وه‌ڵاتێ مه بۆ مه چێكه‌ت و كه‌س ناهێت وه‌ڵاتێ مه به‌ره‌ڤ پێش ببه‌ت، ئه‌گه‌ر ئه‌م ب خو ئاماده نه‌بین ڤی ئه‌ركی بێخینه سه‌ر ملێت خۆ و ئه‌م ب خۆ وه‌ڵاتێ خۆ ئاڤه‌دانتر بكه‌ین. من هیڤی و ئومێده‌كا زۆر یا ب هنگو هه‌ی یا ب شیانێت هنگو هه‌ی، كو هنگ ب شیان و زانست و پەروەردا خۆ و په‌روه‌ردا خۆ دێ گه‌ل و وه‌ڵاتێ خو زێده‌تر پێشڤه‌به‌ن، هیڤیا من ئه‌وه كو هنگ گوهێ خۆ نه‌ده‌نه چ پڕوپاگه‌نده‌یه‌كی، كو رێگریێ ل هنگو بكه‌ت هنگ ئاینده‌یه‌كا گه‌ش به‌رێ خو بده‌نه وه‌ڵاتێ خو، من ئومێده‌كا زۆر یا هه‌ی كو داهاتیێ وه‌ڵاتێ مه، داهاتیه‌كێ گه‌له‌ك یێ پرشنگدار و ئاڤه‌دانه و ب هیڤیا خودێ و پشته‌ڤانیا هنگو دێ شێین وه‌ڵاتێ خو رۆژ ب رۆژ به‌ره‌ڤ سه‌ركه‌فتنێ و ئاڤه‌دانیێت زێده‌تر به‌ین.
پێتڤییە گەنج و قوتابیێن کوردستانێ، بزاڤا داهێنان و بدەستڤەئینانا داهێنانان بکەن، داکۆ ب رێکا هزرێن داهێنەر، پرۆژێن کارێ نوی و دەلیڤەیێن کاری، بۆ خۆ و بۆ گەنجێن دیش پەیدا بکەن. لێرە ئەز هنگۆ پشت راست دکەمەڤە، کۆ حکومەتا هەرێما کوردستانێ، هەموو رەنگێن پشتەڤانیێ، دێ بۆ کار و پرۆژێن هنگۆ یێن داهێنەر کەت، ئەز باوەرم کۆ گەنجێن کوردستانێ، خەلکێ داهێنەر یێ تێدا و چیێ وان ل گەنجێن داهێنەرێن دونیایێ کێمتر نییە.مە خەلکەکێ گەلەکێ زیرەک و داهێنەر یێن هەی و هیڤیدارم جێ دەستێ وا دە دەمەکێ زوویدا ئەم ببینین و د سەرکەفتی بن.
ئەز جارەکا دی پیرۆزباهیەکا گەرم ل هنگۆ دکەم و هیڤیدارم هەردەم ل ژیانا داهاتیدا د سەرکەفتی بن و ئەم هەمی پێ چێ ببین مفای ل زانست و هێز و شیانێن هنگۆ وەربگرین ، داكو كوردستانا خۆ ڕۆژ ب ڕۆژ سەربێخین .
بمینن ب خێر و خۆشیێدا و کوردستانا مەش هەر یا ئاڤەدان بیت .