رووداوەکانی خنکان لە چەم و رووبارەکانی هەرێمی کوردستان روویان لە زیادبوون کردووە. لە زۆر شوێندا تابلۆی "مەلەکردن قەدەخەیە" دانراوە، بەڵام بەشێکی هاوڵاتییان پابەند نەبوون و ئەمساڵ، تاوەکو ئێستا 77 کەس گیانیان لەدەستداوە.

لەم بارەیەوە سەرکەوت کاڕەش، گوتەبێژی بەرگریی شارستانیی هەرێمی کوردستان، دەڵێت: لە سەرەتای ئەمساڵەوە تاوەکو ئێستا 77 کەس لە ئاوی رووبار و چەمەکاندا خنکاون و تیمەکانیان توانیویانە تەرمی 76 کەس بدۆزنەوە.

بەپێی ئامارەکانی بەرگریی شارستانی، ژمارەی رووداوەکانی خنکان بەسەر شار و ئیدارە سەربەخۆکاندا بەم شێوەیە دابەش بوون: 

هەولێر: 21 کەس. 

سۆران: 13 کەس.

زاخۆ: 11 کەس. 

سلێمانی: 9 کەس. 

دهۆک: 7 کەس. 

راپەڕین: 5 کەس.

گەرمیان: 5 کەس.

ئاکرێ: 1 کەس.

بە بەراورد بە ساڵی ڕابردوو، لە تەواوی ساڵەکەدا تەنیا 68 رووداوی خنکان لە سەرتاسەری هەرێمی کوردستان تۆمارکرابوون، بەڵام بۆ ئەمساڵ هێشتا دوو مانگ بۆ کۆتایی ساڵ ماوە و ئامارەکە گەیشتووەتە نزیکەی 77 رووداو.