روسیا بە مووشەک هێرش دەکاتە سەر کیێڤ

ڕۆژی دووشەممە 10-10-2022 روسیا سەرتاسەری ئۆکرانیای بۆردومان کرد و ئەمەش وەک هێرشی تۆڵەسەندنەوەیەکە، پاش ئەوەی ڤلادیمیر پوتین ئۆکرانیای بە تەقینەوە گەورەکەی سەر پردی کریمەی تۆمەتبار کرد.

هێرشە مووشەکیەکانی روسیا کرانە سەر کیێڤی و ئەمەش توندترین هێرشە بۆ سەر پایتەختەکە لەو کاتەوەی ڕوسیا لە هەفتەکانی سەرەتای جەنگدا وازی لە گرتنی پایتەخت هێنا.

پۆلیسی ئۆکرانیا لەسەر هێرشەکە ڕایگەیاندووە کە 10 کەسی سڤیل کوژراون و 60 کەسیش بریندار بوون.

پۆلیسی ئۆکرانیا ئەوەشی راگەیاند لە ناوچەکانی لڤیڤ، تێرنۆپیل و ژیتۆمیر لە ڕۆژئاوای ئۆکرانیا و دنیپرۆ و کرێمنچوک لە ناوەڕاستی ئۆکرانیا روسیا هێرشی مووشەکی کردووە.

پۆلیسی وڵاتەکە ئاماژەی بەوەشکردووە کە “روسیا هەوڵ دەدات لەناومان ببەن و لەسەر ڕووی زەوی بمانسڕنەوە”.