پۆلیسی هەولێر، دایك و كچێكیان لە كاتی دزی و فێڵكردن لە شوفێران دەستگیر كرد.
بەشی پۆلیسی نەهێشتنی تاوانی هەولێر - نووسینگەی خەبات، لە راگەیەنراوێکدا دەڵێ" دایك و كچێك بە ناوەکانی (ق.ف.چ) و (ئ.ش.ح) لەكاتی دزی و فێڵكردن لە شوفێران دەستگیر كراون.
بەپێی راگەیەنراوەکە"ئەو دایك و كچە لەسەر رێگای هەولێر - خەبات، دەستیان لە ئۆتۆمبێلی بارهەڵگر راگرتووە و دوای وەستانی بارهەڵگرەكان، دایكەكە شوفێرەكانی سەرقاڵكردووە و كچەكەشی پارە و شتومەكی لەنێو چەكمەجەی ئۆتۆمبێلەكان دزیوە".
پۆلیسی هەولێر ئاماژەی بەوەش کردووە، ئەو دایك و كچە پێشتریش هەمان پێشینەیان لای پۆلیس تۆمار كراوە و زیاتر لە 10 هەزار دۆلاریان لە شوفێران دزیوە. و ئێستا بەپێی ماددە 446 لە یاسای سزاکانی عێراقی دۆسیەیان بۆ کراوەتەوە و دادگایی دەکرێن.