سعوودیە ڕێکارەکانی پێدانی ڤیزای عومرەی بۆ 14 وڵات ڕاگرتووە، عێراق و هەرێمی کوردستان لەناو ئەو بڕیارەن، تا تەواو بوونی پرۆسەی حەجی ئەمساڵ ڤیزا بە کەس نادرێت.

پێدانی ڤیزای عومرە بەشێوەی ئەلیکترۆنییە و لەلایەن کۆمپانیاکانەوە لەڕێگەی ماڵپەڕی NUSUK دەستەبەر دەکرێت. بەڵام چەند ڕۆژێکە ئەو پرۆسەیە ڕاگیراوە.

کاروان ستوونی، وتەبێژی بەڕێوەبەرایەتی حەج و عومرە ڕایگەیاند، لە ڕۆژی 30ـی ئادارەوە ئەو یوزەرەی لەلایەن سعوودیە دراوە بە کۆمپانیاکان بۆ داواکاری ڤیزا بەشێوەی ئەلیکترۆنی، ناچالاک کراوە، بەو هۆیەوە داواکاری ڤیزای هیچ کەسێک نەگەڕاوەتەوە.

• ڕاگرتنی پێدانی ڤیزا تەنیا بە هاووڵاتییانی عێراق نییە، بەڵکو بڕیارەکە بۆ 14 وڵاتە.
• سعوودیە دەویەوێت ئەوەی ساڵی پار ڕوویدا دووبارە نەبێتەوە و ڕێگا نادات کەس بە ڤیزای یەک ساڵە یان گەشتیاری پرۆسەی حەج ئەنجام بدات.
• ئەمساڵ پرۆسەی حەج لە نێوان 10 بۆ 15ـی مانگی پێنج دەستپێدەکات، تا ناوەڕاستی مانگی شەش بەردەوام دەبێت.