لەم مانگی ئابەدا پلەی گەرما لە هەرێمی کوردستان لە نێوان 36-41 پلەی سیلیزیدایە، ئەمەش بەراورد بە پارساڵ چەند پلەیەک دابەزیوە.

ئەژی چەتۆ، بەرپرسی راگەیاندنی فەرمانگەی کەشناسی و بومەلەرزەزانی هەرێمی کوردستان بە تۆڕی میدیایی باڵکێشی راگەیاند، بەراورد بە پار، هاوینی ئەمساڵ نیمچە فێنک بووە، چونکە تائێستا تەنیا سێ شەپۆلی گەرما هەرێمی کوردستانی گرتۆتەوە و تەنیا یەک جار پلەی گەرما گەیشتۆتە 46 پلە و لە گەرمیانیش گەیشتە 51 پلە، بەڵام پار تا ئەم کاتە 6 شەپۆلی گەرمای بەتین کوردستانی گرتبووەوە و پلەی گەرما لە هەولێر و سلێمانی چەند جارێک سەرووی 45 پلەی تۆمارکرد.

بە گوێرەی پێشبینییەکانی کەشناسی، لە 24 کاتژمێری داهاتوودا پلەی گەرما لەنێوان 36-43 پلە دەبێت، ئەم پلەیەش بەراورد بە ساڵانی پێشوو نزمە.

هەرچەندە هاوینی کوردستان کەمێک فێنک بووە، بەڵام بەرزترین پلەی گەرمای ئەمساڵی جیهان لە سنووری سەماوەی عێراق تۆمارکراوە کە 53 پلە بووە.