22-10-2020
حازم جەعفەر/ باڵکێش
پێشبینییەکانی ڤایرۆسی کۆرۆنا ترسناکن و گواستنەوەی ڤایرۆسەکەش بە ڕێژەیەکی بەرز زیادی کردووە.
ئاسۆ حەوێز، وتەبێژی وەزارەتی تەندروستی حکومەتی ھەرێمی کوردستان ڕایگەیاند، پێشبینییەکانی ڤایرۆسی کۆرۆنا ترسناکن و لە ماوەی 24 کاتژمێری ڕابردوودا ژمارەی تووشبووانی ڤایرۆسەکە بە ڕێژەیەکی بەرز زیادی کردووە.
وتیشی: "پێشبینییەکان ترسناکن و پێویستی بە بەشداربوونی ھەموو چین و توێژەکانی گۆمەڵگەیە، بۆ ھۆشیارکردنەوەی ھاووڵاتییان لەم ڤایرۆسە".
ئاماژەی بەوەشکرد، بە سەرپەرشتی وەزیری تەندروستی و بە یاوەری ئەنجومەنی ڕاوێژکاری پزیشکانی پسپۆڕ و ڕاوێژکاران، ئەمڕۆ پێنجشەممە 2020/10/22، لەگەڵ ڕێکخراوی تەندروستی جیهانی WHO لە کۆبوونەوەیەکی تایبەتدان لەسەر ڕەوشی کۆرۆنا لە هەرێمی کوردستان.
ئەمە لە کاتێکدایە لە ماوەی چەند ڕۆژی ڕابردوودا، ڤایرۆسی کۆرۆنا لە ھەرێمی کوردستان ژمارەی پێوانەیی تۆمار کردووە و رۆژانە زیاتر لە ھەزار کەس تووشی ڤایرۆسەکە دەبن.
