04-05-2023
شاندێکی وەزارەتی دەرەوەی ئەمەریکا، بەسەرۆکایەتیی یاریدەدەری وەزیری دەرەوەی ئەمەریکا بۆ کاروباری ڕۆژهەڵاتی ناوەڕاست، سەردانی هەولێری کرد و لەگەڵ سەرۆکوەزیرانی هەرێمی کوردستان کۆبووەوە.
یاریدەدەری وەزیری دەرەوەی ئەمەریکا، لەلایەن مەسرور بارزانی، سەرۆکوەزیرانی هەرێمی کوردستان پێشوازیی لێ کرا و بەیەکەوە کۆبوونەوە.
پاش کۆبوونەوەی نێوانیان و بەپێی راگەیەندراوی پێگەی فەرمیی حکومەت، هەردوولا هاوڕابوون لەوەی کە "پێویستە بە زووترین کات، رێککەوتنی نێوان هەرێمی کوردستان و حکومەتی فیدراڵی تایبەت بە نەوت جێبەجێبکرێت و هەناردەکردنەوەی نەوت، دەستپێبکاتەوە".
لە کۆبوونەوەکەدا، یاریدەدەرەی وەزیری دەرەوەی ئەمەریکا، جەختی لە پەیوەندی نێوان هەرێمی کوردستان و ئەمەریکا کردەوە و لەبارەی پەیوەندییەکانیانەوە دەڵێت: بەردەوام فراوانتر دەبن.
لە کۆبوونەوەکەی نێوان یاریدەدەری وەزیری دەرەوەی ئەمەریکا و سەرۆکوەزیرانی هەرێمی کوردستان، هەریەک لە باڵیۆزی ئەمریکا لە بەغدا و کۆنسوڵی گشتیی ئەمەریکا لە هەرێمی کوردستان ئامادە بوون.
هەر لەبارەی کۆبوونەوەی هاوبەشی نێوانیان، 'وەزارەتی دەرەوەی ئەمەریکا - کاروباری ڕۆژهەڵاتی ناوەڕاست' لە توویتێکدا ئاماژەی بە گرنگیی سەردانەکە کردووە و دەڵێت: چۆنیەتی دابینکردنی ئاسایش و سەقامگیریی زیاتری ناوچەکە لەڕێگەی هاوکاری نێوان کوردستان و بەغدا و ئەمریکا، باسی لێوە کرا.
لەو کۆبوونەوەکەدا، "گفتوگۆ سەبارەت بە دۆخی هەرێمی کوردستان و ئەنجامدانی هەڵبژاردنی پەرلەمانی کوردستان کرا" و لە ڕاگەیەندراوی پێگەی فەرمیی حکومەتیشدا هاتووە کە هەردوولا دووپاتیان کردەوە پێویستە ئەمساڵ هەڵبژاردن لەکاتی دیاریکراوی خۆیدا بکرێت و سەرۆکوەزیرانیش "ئامادەیی حکومەتی هەرێمی کوردستان بۆ پێشکەشکردنی هەموو کارئاسانییەک دەربڕی".
کۆبوونەوەکە چەند تەوەرێکی دیکەشی لەخۆ گرتبوو لەوانە؛ چاکسازییەکانی وەزارەتی پێشمەرگە و رێککەوتنی شنگال بۆ ئاساییکردنەوەی دۆخی ناوچەکە.
فەرمانگەی میدیا و زانیاری٤ـی ئایاری ٢٠٢٣
