وەزارەتی کشتوکاڵ هاوردەکردنی 7 بەروبوومی کشتوکاڵی قەدەغەکرد
وەزارەتی کشتوکاڵ و سەرچاوەکانی ئاوی حکومەتی هەرێمی کوردستان بڕیاریدا، هاوردەکردنی حەوت بەروبوومی کشتوکاڵی قەدەغە بکات.
وەزارەتی کشتوکاڵ لە 1-8-2020 هاوردەکردنی (هەنار، هەنجیر، سێو، شووتی، پەتاتە، خەیار و هەنگوین)قەدەغە دەکات.
بێگەرد تاڵەبانی، کشتوکاڵ و سەرچاوەکانی ئاو، بە نووسراوی ژمارە 3053 لە 15-7-2020 هاوردەکردنی حەوت بەروبومی کشتوکاڵی قەدەغە کردووە، نووسراوەکەشی ئاراستەی وەزارەتی دارایی و ئابووری و بەڕێوەبەرایەتی گشتیی گومرگ کردووە و تێیدا دەڵێت:” پاڵپشت بە یاسای پاراستن و پێشخستنی بەروبوومی کشتوکاڵی ژمارە 4 ساڵی 2008 بەمەبەستی پاراستنی بەرهەمی جوتیارانی خۆماڵی، بڕیاردرا بە قەدەغەکردنی هاوردە کردنی ئەم بەروبوومە کشتوکاڵییانە لە دەرەوەی وڵات لە رێککەوتی 1-8-2020 (هەنار، هەنجیر، سێو، شووتی، پەتاتە، خەیار، هەنگوین) بۆ کاتێکی نادیار. هەروەها هەر شوێنێک بەروبوومی هاوردەکراوی لێ بگیرێت، سزا دەدرێت بە داخستنی بۆ ماوەی هەفتەیەک.