ئەمرۆ شەممە 2023/3/25 پیاوێکی تەمەن 50 ساڵ لە چیای ئاسۆس کەوتە خوارەوە و تیمەکانی بەرگری شارستانی بە ھەلیکۆپتەر رزگاریانکرد.

پیاوەکە لەگەڵ هاوڕێیەکی بە چیای ئاسۆسدا هەڵگەڕاون لە ناحیەی بنگردی سەر بە دوکان، لەسەر چیاکە هەڵدێراوە.

عەلی قادر وتەبێژی بەرگری شارستانی رانیە رایگەیاند، دەمودەست تیمەکانیان بەهانای کەسەکەوە چوون، بەڵام شوێنەکە ئەوەندە سەخت بووە نەیانتوانیوە رزگاری بکەن، بۆیە داوای هاوکارییان لە تیمی فرۆکەوانی سلێمانی کردووە و بە کۆپتەر رزگاریان کردووە.

پیاوەکە براوەتەوە بۆ نەخۆشخانەی قەڵادزێ و لەوێوە گواستراوەتەوە بۆ سلێمانی.