كاروان كه‌لاری/ باڵكێش
دوای ئه‌وه‌ی سه‌رۆكوه‌زیرانی پێشووتری عێراق، حه‌یده‌ر عه‌بادی كۆتایی هاتنی داعشی له عێراق ڕاگه‌یاند، له‌ئێستادا ئه‌و ڕێكخراوه به‌شێوازێكی نوێ و كاریگه‌ر خۆی ڕێكخستووه‌ته‌وه و چالاكییه‌كانی فراوانتر كردووه، به‌تایبه‌ت له ناوچه كوردستانییه‌كانی ده‌ره‌وه‌ی ئیداره‌ی هه‌رێمی كوردستان و پارێزگاكانی سه‌ڵاحه‌دین و موسڵ و دیاله.
له‌باره‌ی جموجوڵ و زیادبوونی چالاكییه چه‌كدارییه‌كانی داعش له پارێزگاكانی سه‌ڵاحه‌دین و كه‌ركو ك و موسڵ و دیاله، عه‌لی حسه‌ینی، وته‌بێژی میحوه‌ری باكوری عێراقی هێزه‌كانی حه‌شدی شه‌عبی به تۆڕی میدیایی باڵكێشی وت: “له‌ئێستادا داعش خۆی ڕێكخستووته‌وه، جموجوڵی زیاتر بووه و به‌هێزیشه له‌و پارێزگایانه، چونكه له‌لایه‌كه‌وه ناوچه‌كه زۆر فراوانه، له‌لایه‌كی تره‌وه ئه‌و ناوچانه‌ی داعش خۆی تێدا حه‌شارداوه، ئاوی خواردنه‌وه و به‌شێكی زۆری زه‌خیره‌كانی مانه‌وه و شه‌ڕی پارتیزانیی تێدایه، بۆیه به ئاسانی كۆنترۆڵ ناكرێت.”
سه‌باره‌ت به‌وه‌ی ئایا جموجوڵ و چالاكییه چه‌كدارییه‌كانی داعش، تاوه‌كو چه‌ند په‌یوه‌ندی به بڕیاری كشانه‌وه‌ی ئه‌مریكاوه هه‌یه، وته‌بێژه‌كه‌ی حه‌شدی شه‌عبی، وتی: “ئه‌مریكا خۆی ئه‌م داعشانه‌ی هێناوه، ئه‌م داعشانه بڕیار له ئه‌مریكا وه‌رده‌گرن و ئه‌مریكین، بۆیه له‌و ڕووه‌وه په‌یوه‌ندی به ئه‌مریكاوه هه‌یه كه ئه‌مریكا خۆی ئه‌مانه‌ی هێناوه، نه‌ك به‌وه‌ی ئه‌مریكا شه‌ڕی ئه‌مانه‌ی كردبێت و ئێستا به كشانه‌وه‌ی داعش جموجوڵی زیادی كردبێت و خۆی ڕێكخستبێته‌وه.”
له‌باره‌ی هه‌ماهه‌نگی حه‌شدی شه‌عبی له‌گه‌ڵ هێزه‌كانی هاوپه‌یمانان و پێشمه‌رگه و ئه‌نجامدانی ئۆپه‌راسیۆنی هاوبه‌ش دژی داعش ڕایگه‌یاند: “كه هیچ جۆره هه‌ماهه‌نگییه‌كیان له‌گه‌ڵ هاوپه‌یماناندا نییه و ئاماژه‌ی به‌وه‌ش كرد، كه له‌و سنورانه‌ی ئه‌وانی تێدایه، پێشمه‌رگه‌ی تێدا نییه، تاوه‌كو ئۆپه‌راسیۆنی هاوبه‌ش ئه‌نجام بده‌ن.”
له‌باره‌ی گۆڕینه‌وه‌ی زانیاری سه‌ربازی و هه‌واڵگری له‌گه‌ڵ پێشمه‌رگه ئاشكرای كرد: “له‌و ڕووه‌وه هه‌ماهه‌نگییان له‌گه‌ڵ پێشمه‌رگه‌دا هه‌یه و زانیاری هه‌واڵگری و سه‌ربازی ده‌گۆڕنه‌وه و باسی له‌وه كرد، كه ئه‌وان و پێشمه‌رگه دوو هێزی فه‌رمین و سه‌ربه وه‌زاره‌تی به‌رگری حكومه‌تی عێراقی فیدراڵن و جه‌ختیشی كرده‌وه، كه هه‌ركاتێك زانیارییان له‌سه‌ر داعش یان هه‌ر گروپێكی تری چه‌كداریی هه‌بێت، سه‌ره‌وه‌ی خۆمانی لێ ئاگادار ده‌كه‌نه‌وه و به بڕیاری سه‌ره‌وه‌ی خۆیان ئۆپه‌راسیۆن ئه‌نجام ده‌ده‌ن، له هه‌ر كات و شوێنێك بێت.”
له‌باره‌ی ئه‌و ئاڵۆزییه‌ی چه‌ند هه‌فته‌ی ڕابردوو كه له‌نێوان هێزێكی حه‌شدی شه‌عبی و فه‌وجی 1ی لیوای 3ی پیاده ڕوویدا له خانه‌قین، ئاماژه‌ی به‌وه كرد: “كه ئه‌وان ڕێزی پێشمه‌رگه ده‌گرن و هه‌وڵ ناده‌ن كێشه له‌نێوانیاندا دروست ببێت و هه‌ر كێشه‌یه‌كیش له‌نێوانیاندا دروست ببێت به گفتوگۆ له‌گه‌ڵ پێشمه‌رگه چاره‌سه‌ری ده‌كه‌ن و ناهێڵن بگاته پێكدادانی چه‌كداریی.”
ئه‌مه له‌كاتێكدایه، له‌دوای كۆنترۆڵكردنه‌وه‌ی پارێزگاكانی موسڵ و سه‌ڵاحه‌دین و به‌شێك له ناوچه‌كانی پارێزگای دیاله، له‌لایه‌ن پێشمه‌رگه و حه‌شدی شه‌عبی و سوپای عێراقه‌وه، داعش له‌شێوه‌ی گروپی چه‌كداریی بچووك خۆی ڕێكخستووه‌ته‌وه، چه‌ند جارێكیش هێرشی كردووه‌ته سه‌ر هێزه‌كانی سوپای عێراق و حه‌شدی شه‌عبی و هێزه‌كانی پێشمه‌رگه له سنوری میحوه‌ری كوڵه‌جۆ، له‌ڕێگه‌ی دانانی بازگه‌ی كاتییشه‌وه چه‌ندین هاوڵاتی ئاسایی ئه‌م ناوچانه‌ی ڕفاندووه و دواتر یان كوشتوونی یان به‌رامبه‌ر به پاره‌یه‌كی زۆر ئازادی كردوون، ماوه‌یه‌كیشه هێرش ده‌كاته سه‌ر گونده‌كانی (ئوم حنته و ئیسڵاح و شێرك) و چه‌ند گوندێكی تری ناحیه‌ی گوڵاڵه‌ی قه‌زای خانه‌قین و به‌و هۆیه‌شه‌وه تائێستا چه‌ندین هاوڵاتی كوژراون، شه‌وی ڕابردووش به (هاوه‌ن) هێرشی كرده سه‌ر گوندی (ئیسڵاح)ی ناحیه‌ی گوڵاڵه‌ی سه‌ربه قه‌زای خانه‌قین و به‌و هۆیه‌وه پێنج كه‌س برینداربوون، له كه‌ركوكیش هێرشی كرده سه‌ر پۆلیسی فیدراڵیی عێراق و به‌و هۆیه‌وه پێنج پۆلیسی كوژران.