دەزگای هەواڵگریی وەزارەتی ناوخۆی عێراق ڕایگەیاند، سەرکردەیەکی داعشیان لە قەزای چەمچەماڵ دەستگیرکردووە.
ئەمڕۆ پێنجشەممە 1.10.2020 دەزگای هەواڵگریی وەزارەتی ناوخۆی عێراق ڕایگەیاند: ” بەڕێوەبەرایەتی هەواڵگریی سەڵاحەدین بە هەماهەنگی لەگەڵ پاراستنی ئاسایشی پارێزگای سلێمانی، تیرۆریستێکیان لە شارۆچکەی چەمچەماڵی سەر بە پارێزگای سلێمانی دەستگیرکرد، کە بەپێی ماددەی 4ـی یاسای تیرۆر داواکراوە و ئەندامی داعشە”.
ئاماژەی بەوەشکردووە “دەستگیرکراوەکە سەر بە ویلایەتی کەرکووکی داعش بووە و ئەبو نەجاح ناسراوبووە، لە لێکۆڵینەوەکانیشدا دانی بەوەدا نا کە ئەندامی داعشە و 22 کردەوەی تیرۆریستی کردووە، وەک هێرشکردنەسەر ماڵی خەڵک و تەقاندنەوە و کوشتنی ژمارەیەکی زۆر لە هاووڵاتیان و بە ئامانجکردنی کارمەندانی هێزەکانی ئاسایش”.
تائێستا دەزگا ئەمنیەکانی هەرێمی کوردستان، هیچ زانیارییەکیان لەوبارەوە بڵاونەکردووەتەوە.