وۆڵ ستریت جۆرناڵ: سێ هۆکار لە پشت بڕیارەکەی ترەمپە بۆ هێرشکردنە سەر دوورگەی خارک

ڕۆژنامەی وۆڵ ستریت جۆرناڵی ئەمریکی لە ڕاپۆرتێکی شیکاریدا، پەردەی لەسەر ئەو هۆکارانە لادا کە وایان لە دۆناڵد ترەمپ، سەرۆکی ئەمریکا کردووە بڕیاری هێرشکردنە سەر دوورگەی “خارک”ی ئێران بدات. ئەم دوورگەیە بە دڵ و ناوەندی سەرەکیی هەناردەی نەوتی ئەو وڵاتە دادەنرێت.

بەپێی ڕاپۆرتەکە، دوورگەی خارک گرنگترین خاڵی ستراتیجیی ئێرانیە بۆ بازرگانیی نەوت، بەو پێیەی زیاتر لە 90%ی تەواوی هەناردەی نەوتی ئەو وڵاتە لەم دوورگەیەوەیە. لێدان لەم دامەزراوەیە بە واتای بڕینی سەرچاوەی سەرەکیی داهاتی تاران دێت، کە مانگانە ملیاران دۆلار بۆ گەنجینەی دەوڵەت دابین دەکات.

وۆڵ ستریت جۆرناڵ لە زاری بەرپرسانی ئەمریکییەوە، سێ پاڵنەری سەرەکی بۆ بڕیارەکەی ترەمپ دەستنیشان دەکات:

ئیفلیجکردنی ئابووریی ئێران: ئامانجی سەرەکی بڕینی شادەماری دارایی تارانە. بەبێ فرۆشتنی نەوتی خارک، توانای ئێران بۆ دابینکردنی بودجەی سوپای پاسداران، گرووپە حیزبوڵڵا، حووسییەکان، حەماس و بەرنامە ئەتۆمییەکەی بە خێرایی دادەڕمێت.

وەڵامدانەوەی هێرشەکانی کەنداو: ئەم هەنگاوە وەک پەرچەکردارێکی توند دێت دژی هێرشەکانی ئەمدواییەی ئێران بۆ سەر دامەزراوە نەوتییەکان و باڵیۆزخانەکانی ئەمریکا لە سعودیە، ئیمارات و بەحرێن. پەیامی واشنتن ڕوونە: “بەرامبەر بە ئامانجگرتنی نەوتی هاوپەیمانەکان، نەوتی ئێوە لە ڕەگەوە دەبڕین.”

زیادکردنی گوشاری ناوخۆیی: ئیدارەی ترەمپ پێیوایە هەرەسی ئابووری بەهۆی ڕاوەستانی هەناردەی نەوت، دەبێتە هۆی سەرهەڵدانی ناڕەزایەتی زیاتری خەڵکی ئێران و لاوازکردن یان ڕووخانی دەسەڵات.

سەرەڕای ئامانجە سیاسییەکان، شارەزایان هۆشداری لە لێکەوتەکان دەدەن. هێرشەکە بازاڕەکانی جیهانی شڵەژاندووە و نرخی نەوتی بۆ سەرووی 100 دۆلار بەرزکردووەتەوە. هاوکات وڵاتی چین، وەک گەورەترین کڕیاری نەوتی ئێران، نیگەرانیی قووڵی خۆی نیشانداوە و پێشبینی دەکرێت کاردانەوەی هەبێت.