چین گەورەترین كەشتی ئاسمانیی دروست دەکات
لە راگەیەندراوێكی (دەزگای نیشتیمانیی بۆ زانستە سروشتییەكان) ی سەر بە (وەزارەتی زانست و تێكنۆلۆژیا) ی كۆماری (چین) دا، داوای لە پسپۆڕان و شارەزایانی وڵاتەكەی كردووە بۆ پێشكەشكردنی رەشنووسی سەرەتایی دروستكردنی گەورەترین كەشتی ئاسمانیی كە رەنگە درێژییەكەی بگاتە سنووری یەك كیلۆمەتر. ئەم داواكارییە وەك راپۆرتێك لەنێو رۆژنامەی (South China Morning Post) دا بڵاوكراوەتەوەو تیایدا هاتووە، دروستكردنی ئەم كەشتییە ئاسمانییە هەرە گەورەیە لە پێناو دۆزینەوەی نهێنییەكانی گەردوون و مانەوەی دوورودرێژ دەبێت لەنێو خولگە ئاسمانییەكاندا، هەربۆیە، دەزگایەكە داوای لە لێكۆڵەرەوان كردووە كەوا رێگاكانی دیزاینكردنی ئەو كەشتییە ئاسمانییە پێشكەش بكەن كە لە مادەی سووك بەڵام زۆر توندو تۆڵ دروست بكرێ و بە شێوەیەی چەند پارچەیەیی لە زەوییەوە رەوانەی بۆشایی ئاسمانی دەرەوە بكرێت و لەوێوە بە شێوەیەكی ئارام ئەو بەش و پارچانە یەكبخرێن و كۆبكرێنەوە لەسەر شێوەی كەشتییەكی ئاسمانی مەزن، وە بۆ ئەم مەبەستە، دەزگایەكە بڕی 2.3 ملیۆن دۆلاری وەك تێچوونەكانی لایەنی (دراسە الجدوی) ی پرۆژەكەی تەرخان كردووەو بۆ ماوەی 5 ساڵیش بەردەوام دەبێت. لە پێش چاوان، ئەم پرۆژەیە وەك بابەتێكی نێو فیلمەكانی خەیاڵی زانستیی دەچێت، بەڵام كۆمەڵێك لە پسپۆڕان بۆ سایتی (Live Science) دا جەختیان لەسەر ئیمكانییەتی تەكنیكی بۆ ئەنجامدانی ئەم پرۆژەیە كردووە، سەرەڕای پێویست بوونی بە تێچوونێكی یەگجار زۆر بەرز. یەكێ لەوانە (مێیسۆن بیك) ی ئەندازیاری پێشوو لە ئاژانسی (ناسا) كە سەبارەت بە دروستكردنی كەشتییەكی ئاوا گەورە رایگەیاندووە:"بیرۆكەكە وانییە كە جێبەجێ نەكرێت، بەڵام چالنج واتە بەرەنگاربوونەوەی هەرە گەورە لێرەدا بوارە ئەندازەییە – پراكتیكییەكەیە كە تاچەند لە دروستكردنیدا بە وردیی پەیڕەو دەكرێت، من پێم وایە دەكرێت!" لە بەرامبەردا، (مایكڵ لێمبیك) ی مامۆستای ئەندازەی فڕین لە (زانكۆی ئیلینۆی) رایگەیاندووە:"هەرچەندە لە رووی تەكنیكییەوە دەكرێ پەیكەرێكی ئاوا دروست بكرێت، بەڵام بە شێوەیەكی پراكتیكی، نەخێر من پێم ئەستەمە، بە تایبەتیش لە رووی تێچوونەوە، بۆ نموونە، (وێستگەی ئاسمانیی نێو دەوڵەتیی – ئەلفا) كە درێژییەكەی 110 مەترە نزیكەی 100 ملیار دۆلاری تێچووە تا دروستكراوە، بۆیە دروستكردنی كەشتییەكی یەك كیلۆمەتریی كە 10 جار ئەوەندەی وێستگەی ئەلفا دەبێ ئەوا رەنگە دەزگا هەرە ناودارو دەوڵەمەندەكانیش شەكەت و هەراسان بكات!ّ" هەروەها، بەشێكی دیكە لە پسپۆڕان و ئەندازیاران ترسی خۆیان نیشانداوە لە روودانی دیاردەی (لاربوونەوەی پەیكەر) كاتێك دەكەوێتە ژێر گوشاری كاریگەرییە مەزنەكانی بۆشایی ئاسمان، وەك لەكاتی ئەنجامدانی مانۆڕەكانی خولانەوەو خۆگونجاندن لە خولگە یان لەكاتی ئەنجامدانی پرۆسەی هەستیاری پێكەوە لكاندن لەگەڵ كەشتییە ئاسمانییەكانی دیكە، ئەوكاتە، جووڵەی كەشتییەكە دەبێتە هۆی گواستنەوەی وزە بۆ نێو تەواوی پەیكەرەكەی و لە كۆتاییدا وادەكات ئەو كەشتییە زەبەلاحە بلەرێتەوەو لاربێتەوە.
