02-08-2026
ڤینیسیۆس جۆنیۆر، ئەستێرەی بەرازیلی یانەی ریال مەدرید، خۆی بۆ کۆبوونەوەیەکی یەکلاکەرەوە لەگەڵ بەرپرسانی یانە شاهانەکە ئامادە دەکات. ئەم کۆبوونەوەیە کە بڕیارە راستەوخۆ دوای گەڕانەوەی لە پشووەکەی ئەنجام بدرێت، کۆتایی بەو گومانانە دەهێنێت کە ماوەی ساڵ و نیوێکە دەربارەی داهاتووی ئەم یاریزانە لە سانتیاگۆ برنابیۆ دروست بوون.
گەڕانەوە بۆ مەدرید و کارکردن لەگەڵ مۆرینیۆ
بڕیارە ئەمشەو یەکشەممە، هێرشبەرە بەرازیلییەکە بگاتە مەدریدی پایتەخت، بۆ ئەوەی لە بەیانی رۆژی دووشەممەوە لەژێر سەرپەرشتی جۆزێ مۆرینیۆ، راهێنەری نوێی یانەکە، دەست بە مەشق و راهێنانەکان بکاتەوە.
کۆبوونەوەی بڕیاردان
بەگوێرەی زانیارییەکانی رۆژنامەی ئەی ئێسی ئیسپانی، ئەم کۆبوونەوەیە دەرفەتێک دەبێت بۆ ڤینیسیۆس تاوەکو سەرەتا مۆرینیۆ و پاشان کارگێڕیی یانەکە لە نیازی راستەقینەی خۆی ئاگادار بکاتەوە. گرێبەستی ئێستای ڤینیسیۆس تەنیا 11 مانگی ماوە، ئەمەش وای کردووە نوێکردنەوەی گرێبەستەکەی ببێتە پێشینە؛ چونکە واژۆکردنی گرێبەستێکی نوێ بە واتای مانەوە دێت، بەپێچەوانەشەوە ئەگەری رۆیشتنی لە مێرکاتۆدا بەهێز دەبێت.
دەنگۆکانی ئارسیناڵ و گرێبەستە خەیاڵییەکەی سعودیە
لەکاتێکدا دەنگۆی پەیوەندیکردنی بە یانەی ئارسیناڵی ئینگلیزی لە هەفتەی رابردوودا بەشێوەیەکی بەرفراوان بڵاوبووەوە، بەڵام بەرپرسانی ریال مەدرید رایدەگەیێنین کە هیچ پەیوەندییەکی فەرمیان لەو بارەیەوە پێنەگەیشتووە. نوێنەرانی یاریزانەکەش هەموو جۆرە رێککەوتنێکیان لەگەڵ یانە ئینگلیزییەکە رەتکردووەتەوە.
رۆژنامەی ئەی ئێس ئاماژەی بەوەش کردووە کە لە شوباتی 2025 و دوای پێشکەشکردنی دەستەوارەیەکی گەورەی سعوودی، ڤینیسیۆس و یانەکە لە رێککەوتن نزیک بوون، بەڵام لە کۆتاییدا هیچ شتێک واژۆ نەکرا و ساڵ و نیوێک بەسەر ئەو بابەتەدا تێپەڕیوە بێ ئەوەی گرێبەستە نوێیەکە ببینرێت.
هەڵوێستی ریال مەدرید
یانەی شاهانە تاوەکو ئێستا هێمنە، چونکە ڤینیسیۆس لە پەیوەندییە تەلەفۆنییەکانی ئەم دواییەدا ئارەزووی خۆی بۆ مانەوە دەربڕیوە. لەگەڵ ئەوەشدا، کارگێڕیی یانەکە دەیەوێت یاریزانەکە راشکاو بێت؛ ئەگەر نایەوێت گرێبەستەکەی نوێ بکاتەوە، پێویستە ئێستا بیڵێت تاوەکو یانەکە دەست بە هەنگاوەکانی بکات بۆ گەڕان بەدوای باشترین جێگرەوە لە بازاڕی گواستنەوەکاندا.
ئێستا چاوەکان لەسەر ئەو کۆبوونەوەیە دەبن کە دەریدەخات ئایا ڤینیسیۆس جۆنیۆر وەک کلیلێکی سەرەکی لە پڕۆژەکەی مۆرینیۆدا دەمێنێتەوە، یان لاپەڕەیەکی نوێ لە کاروانی وەرزشیی خۆی لە دەرەوەی ئیسپانیا هەڵدەداتەوە.
