10-08-2020
وەزارەتی تەندروستی نرخی نەخۆشخانە ئەهلییەکانی کەمکردەوە
وەزارەتی تەندروستی حکومەتی هەرێمی کوردستان بڕیاریدا نرخی نەخۆشخانە ئەهلییەکان سنوورداربکات و بڕیاریدا نرخی مانەوەی تووشبووانی کۆرۆنا بۆ 40-50٪ کەم بکاتەوە.
وەزارەتی تەندروستی فەرمانێکی وزاری دەرکردووە و نووسیویەتی"لەبەر بەرژەوەندی گشتیی و لە پێناو پاراستنی مافی نەخۆش و رەچاوکردنی رەوشی خزمەتگوزاری چارەسەری نەخۆشانی کۆرۆنا و بە لەبەرچاوگرتنی باروگوزەرانی هاووڵاتییان و رەوشی ئابووری کوردستان، پاڵپشت بە کۆبوونەوەی ئەنجوومەنی وەزارەت لە 8.8.2020 و کۆبوونەوەی لیژنەی راسپێردراوی وەزارەت، دوای راوێژکردن چەند بڕیارێک دران".
بڕیارەکانی وەزارەتی تەندروستی بەمشێوەیەن:-
1.سنووردراکردن و یەکسانکردن و دانانی نرخی خزمەتگوزارییەکانی تایبەت بە چارەسەرکردنی نەخۆشانی کۆرۆنا لە کەرتی تایبەت و نەخۆشخانەی ئەهلی، بە رەچاوکردنی مەترسی لەسەر ژیانی پزیشکان و کارمەندانی تەندروستی.
2.کەمکردنەوەی نرخی خزمەتگوزاری تایبەت بە چارەسەرکردنی نەخۆشانی کۆرۆنا لە نەخۆشخانە تایبەتەکان بە رێژەی 40-50٪ لە کۆی گشتی خزمەتگوزارییەکان بە گوێرەی چارەسەر.
3.بەڕێوەبەرایەتی پشکنین و بەدواداچوون، بەدواداچوونی رۆژانە و بەردەوام دەکەن بۆ پابەندبوون.
4.نرخەکانی پشکنینی پزیشکانی پسپۆڕ لەلایەن سەندیکای پزیشکان دیاری دەکرێت.
5.تیمی پزیشکی گەڕۆک بۆ ماڵان بەبێ رەزامەندی و رێگەپێدانی وەزارەت قەدەغەیە.
6.بۆ هەر سکاڵایەک هاووڵاتییان دەتوانن پەیوەندی بە هێڵی گەرم بکەن.
7.ئەم فەرمانە لە رۆژی دەرچوونییەوە کاری پێدەکرێت و سەرپێچی و کەمتەرخەمی بەدەر لە نرخەکانی بڕیاردراوە، رێکاری یاسایی دەگیرێتەبەر.
