25-08-2020
بەھۆی دووبارە بڵاو بوونەوەی ڤایرۆسی کۆرۆنا، کۆریای باشوور فەرمانی داخستنی خوێندنگاکانی سیئۆلی دەرکرد.
لە دوای سەرھەڵدانەوەی حاڵەتەکانی تووشبوون بە ڤایرۆسی کۆرۆنا لەو وڵاتەدا، وەک پەیڕەوکردنی نوێترین ڕێوشوێنەکان بۆ ڕیگریکردن لە ڤایرۆسە، بڕیار درا بە داخستنی خوێندنگاکانی ناوخۆی سیئۆل و دەورووبەری.
سەنتەری کۆنتڕۆڵکردنی نەخۆشییەکانی کۆریا ڕۆژی دووشەممە 2020/8/24، 280 حاڵەتی نوێی تووشبوونی بە ڤایرۆسی کۆرۆنا ڕاگەیاند، بەمەش کۆی ژمارەی تووشبووان لەو وڵاتەدا بەرزبۆوە بۆ 17,945 حاڵەت.
لەگەڵ ئەوەشدا کە زۆرینەی حاڵەتاکانی تووشبوون بە ڤایرۆسی کۆرۆنا لە ناوەڕاستی سیئۆلی پایتەختدان، بەڵام کەرتی تەندروستی وڵاتەکە دەڵێت " وڵاتەکە لەسەر لێواری بڵاوبوونەوەی ڤایرۆسەکەیە و داوا لە خەڵک دەکەین لە ماڵەوە بمێننەوە".
ھەرووھا وەزارەتی تەندروستی کۆریای باشووریش ڕایگەیاند، جگە لە خوێندکارانی ئامادەیی، هەموو خوێندکارانی سیئۆل و دەورووبەری تاوەکو 11ـی مانگی 9 لەڕێی ئۆنلاینەوە وانەکانیان وەردەگرن.
وەزارەتی تەندروستی کۆریای باشوور، لەسەر دۆخی سیئۆل ڕایگەیاند، لە ماوەی دوو هەفتەی ڕابردوودا لە سیئۆل و دەوروبەری بە لایەنی کەمەوە 150 خوێندکار و 43 کارمەندی خوێندنگاکان تووشی کۆرۆنا بوون.
