16-09-2020
هەردوو فراکسیۆنی پارتی و یەکێتی رێککەوتننامەیەکیا ئیمزاکردووە و بەگوێرەی رێککەوتننامەکە، لەمەودوا کاری پەرلەمانییان هاوبەش دەبێت.
ئومێد خۆشناو، سەرۆکی فراکسیۆنی پارتی، بە تۆڕی میدیایی باڵکێشی راگەیاند، لەمەودوا هەماهەنگی و پشتیوانییەکانمان زیاتر دەکەین، بەرپرسیارێتییەکانی حکومەت هەڵدەگرین و پرۆژە و پێشنیازی هاوبەشمان دەبێت.
دەقی رێککەوتننامەکە
1. هەردوو فراکسیۆنی پارتی و یەکێتی، پابەند دەبن رێککەوتننامەی 4.3.2019 کە لەلایەن نێچیرڤان بارزانی و کۆسرەت رەسووڵەوە ئیمزاکراون.
2.هەردوولا کۆکن لەسەر ئەوەی هەر بابەتێکی چارەنووسساز بە سازان بکرێت، وەکو ئامادەکردنی دەستوور و یاسای هەڵبژاردن و لامەرکەزییەت
3.هەردوو فراکسیۆن پەیوەندی سیاسیی پتەوتر دەکەن، هاوئاهەنگی زیاتر دەکەن و کاری پێکەوەییان لەژێر رۆشنایی رێککەوتننامەی 4.3.2019 دەبێت
4.سەرۆک و جێگری سەرۆکی پەرلەمان هەماهەنگ و هاوکار دەبن، لە بەڕێوەبردنی کاروباری دەستەی سەرۆکایەتی
5.هەردوولا کۆکن لەسەر بەردەوامی پەیوەندی بە کوتلەی وزاری هەردوو حزب لە کابینەی نۆیەم بە ئاگاداربوون لە پرۆسەی تەشریع و چاودێری و بەرپرسیارێتی هاوبەش
6.لەسەر ئاستی لیژنەکان، هەردوو فراکسیۆن هاوئاهەنگ دەبن
7.هەردوولا پابەند دەبن بەوەی رێنمایی دەدەنە ئەندامانی فراکسیۆنەکانیان، خۆیان لە لێدوانی نێگەتیڤی میدیایی بەدوور بگرن تا کەش و متمانەی کاری پێکەوەیی بۆ جێبەجێکردنی رێککەوتنی سیاسیی زیاتر پتەوبکرێ.
8.هەردوولا بڕیاریاندا کۆبوونەوەی بەردەوامیان هەبێت.
