ژه‌نه‌راڵێكی ئێرانی به كۆرۆنا گیانی له‌ده‌ستدا
كاروان كه‌لاری/ باڵكێش
ئاژانسی ئیسنای ئێرانی بڵاویكرده‌وه، فەرماندەی هێزەكانی سوپا لە پارێزگای مەركەزی كە دەكەوێتە باشووری ڕۆژئاوای تارانی پایته‌خت، بە نەخۆشی كۆرۆنا گیانی لەدەستداوه.
ئه‌مرۆ هه‌ینی، 30ی ئۆكتۆبه‌ر، ئاژانسی ئیسنای ئێرانی بڵاویكرده‌وه و ڕایگه‌یاند، “ژەنەراڵ قاسم جەلیل وەند، ئەندامی لێژنەی ئاسایشی هەرێمی لە پارێزگای مەركەزی، پاش توشبوونی به كۆرۆنا و هه‌فته‌یه‌ك له چاره‌سه‌ر وەرگرتن، باری تەندروستیی تێكچووە و گیانی لەدەستداوە.”
ئەمه له‌كاتێكدایه، كه دوێنێ پێنجشه‌ممه، 29ی ئۆكتۆبه‌ر، موحەمەد باقر قالیباف، سەرۆكی پەرلەمانی ئێران، لە پێگه‌ی تایبه‌تی خۆی له تۆڕی كۆمه‌ڵایه‌تی تویته‌ر، ئاشكرای كرد، “تووشی كۆرۆنا بووە و خۆی كەرەنتینە كردووە.”
بەپـێی ئامارە فەرمیـیەكانی وه‌زاره‌تی ته‌ندروستی ئێران، تائێستا زیاتر لە (596) هەزار كەس لەو وڵاتە تووشی نەخۆشی كۆرۆنا بوون، لەو ژماره‌یه‌ش (34) هەزار كەسیان گیانیان لەدەستداوە.