مەسرور بارزانی، سەرۆکی حکومەتی هەرێمی کوردستان، بڕیاری دا بە پەسندکردنی پڕۆژەپێشنیاری وەزارەتی تەندروستی، بۆ ڕەخساندنی هەلی کارکردن لە کەرتی تایبەت بۆ دەرچووانی کۆلێژەکانی پزیشکیی ددان و کۆلێژەکانی دەرمانسازی و پیادەکردنی پیشەکەیان.
دەقی ڕاگەیاندراوێک لە وەزارەتی تەندروستییەوە:
دوابەدوای دەرچوونی ژمارەیەکی زۆری کۆلێژەکانی پزیشکی ددان و کۆلێژەکانی دەرمانسازی لە زانکۆکانی هەرێمی کوردستان و دوای هەوڵ و کۆششی وەزارەتمان و گرتنەبەری رێکاری پێویست بۆ ڕێکخستنەوەی بنەما یاساییەکانی بواری پلەبەندی پزیشکی بەمەبەستی بەدەستهێنانی ناونیشانی شارەزایی لە بواری کارکردن و بەدەستهێنانی مۆڵەتی کارکردن لە کەرتی تایبەت پیادەکردنی پیشەکەیان بۆ نورینگەکان و دەرمانخانەکان و سەنتەر و کلینیکەکان،
بەسوپاسەوە ڕێزدار (مەسرور بارزانی) جەنابی سەرۆکی حکومەتی هەرێمی کوردستان، بریاری دا بە پەسندکردنی پڕۆژەپێشنیاری وەزارەتمان بەهەماهەنگی لەگەڵ سەندیکاکان بۆ خستنەبواری جێبەجێکردنی پێدانی ناونیشانی کارکردن و مۆڵەت بۆ رەخساندنی هەڵی کارکردن لەکەرتی تایبەت بۆ دەرچوانی کۆلێژەکانی پزیشکی ددان و کۆلێژەکانی دەرمانسازی و پیادەکردنی پیشەکەیان بۆ ئەوانەی ڕاهێنان و خۆبەخشیان کردووە و ڕاهێنراو بوونە، بۆ ئەم مەبەستە رێکاری پێویست و جێبەجێکردنی ڕێنماییەکانی دەگیرێتەبەر بەهەماهەنگی لەگەل سەندیکا پەیوەندارەکانی سەندیکای پزیشکانی ددانی کوردستان و سەندیکای دەرمانسازانی کوردستان.
بەناوی وەزارەتی تەندروستی حکومەتی هەرێمی کوردستان سوپاس و ستاییشی ئەم بڕیارە گرنگ و ستراتیجیەی ڕێزدار (مەسرور بارزانی) جەنابی سەرۆکی حکومەتی هەرێمی کوردستان دەکەین لەپێناوی رەخساندنی هەڵی کار و پەرەپێدانی خزمەتگوزاری تەندروستی وە ڕەچاوکردنی بەرژەوەندی گشتی بۆ دەرچوانی کۆلێژەکانی پزیشکانی ددان و کۆلێژەکانی دەرمانسازی
وەزارەتی تەندروستی
حکومەتی هەرێمی کوردستان
٣٠ سێپتێمبەر ٢٠٢٤