سەرۆکی حکومەت:
هەرێمی کوردستان ناوچەیەکی دەوڵەمەندە لە بواری کەرەستەی خاو و سامانی سروشتی کە بنەمایەکی سەرەکی گەشەپێدانی کەرتی پیشەسازییە
ئەمڕۆ یەکشەممە 11/19، مەسرور بارزانی، سەرۆکی حکومەتی هەرێمی کوردستان، بەردی بناخەی پڕۆژەی ناوچەی پیشەسازی و کارگەی ڕیسایکلینی زبڵ و خاشاکی لە ناحیەی ڕزگاری لە سنووری ئیدارەی سەربەخۆی زاخۆ دانا.
لە ڕێوڕەسمەکەدا، سەرۆکی حکومەت لە گوتارێکدا ئاماژەی بەوە دا کە ئەم پڕۆژانە هەلی کار بۆ هەزاران کەس دەرەخسێنن و کاریگەریيان لەسەر گەشەپێدانی ئابووری هەرێمی کوردستان دەبێت.
ئەمەش دەقی گوتاری سەرۆکی حکومەتی هەرێمی کوردستانە:
بناڤێ خودێ مەزن و دلۆڤان
خۆشحالم، کو جارەکا دیش هاتینەڤە باژێڕێ زاخۆکا دەلال و لگەڵ هنگۆ یێت خۆشتەڤی یێ پشکدارم ل دانانا بەرێ بنیاتی بۆ دو پڕۆژێت گرنگ، کو پێک دهێن ل ناڤچەیا پێشەسازی ل زاخۆ و کارگەیا لێکجوداکرنا گلێشی ( Recycling)، کو هەردو پڕۆژە گەلەک دگرنگ و ستراتیجینە و دێ مفایەکێ زۆر گەهیننە ئەڤێ دەڤەرێ. دەستخۆشیێ ل کۆمپانیایێن یا جی ب جیکار دکەم و هیڤیدارم ب رەنگەکێ باش ئەڤ دوو پرۆژە بێنە ئەنجامدان.
مە ل ساڵێن رابۆری، کار کر داکو پڕۆژەیێت هۆ وەکی ناڤچەیا پێشەسازی ل باژێڕ و پارێزگەهێت دیش یێت کوردستانێ هەبن. ئەڤ پڕۆژە فورسەت و دەلیڤێت کاری بۆ سەدان بەلکی هزاران کەسان ل کوردستانێ دابین دکەن و ئابووریا هەرێما کوردستانێش دێ بەرەڤ پێش بەت.
پێشڤەبرنا کەرتێ پێشەسازی لگەل کەرتێت دی، دێ کاریگەریەکا دیار ل سەر پێشڤەچوونا کوردستانێ هەبیت.
ئەڤرۆ ل دونیایێ، ئەو وەلات ب پێشکەڤتی دهێنە زانین، کو ل روی یێ پێشەسازیێ ڤە د پێشکەڤتی بن و داهێنانێ د بەرهەمئینانا پێدڤیێت ژیانا مرۆڤی دا دکەن.
خۆشبەختییە، کو هەرێما کوردستانێ دەڤەرەکا زەنگینە د بیاڤێ کەرستێت خاڤ و سامانێت سروشتی، کو بنیاتەکێ سەرەکی یێ گەشەکرنا کەرتێ پێشەسازیێ یە. بازاڕێ کوردستانێش، بازاڕەکێ نوی و پێگەهشتی یە و
پێدڤی ب هەر کەل و پەلەکی هەیە، کو دڤێت ئەم کار ل سەر بکەین بۆ دەستەبەرکرنا پێداویستیێت مە یێن ناڤخۆیا کوردستانێ و ئینانا کەل و پەلان ل دەرڤە یا سنووردار بیت و بێتە کێمکرن.
بۆ پێشئێخستنا کەرتێت ئابووری، مە پێدڤی ب پێکڤەگرێدانا بازاڕێت کوردستانێ هەیە، ئەڤەش دێ ب رێکا هەبوونا رێکوبانێت باش هێتە کرن داکو هاتن و چوونێ ب ساناهی بێخن و وەختیش دێ کورت کەن و دەرئەنجام دێ تێچوویێت داراییش بۆ خودان کاران کێم بن. مە ل ساڵێت رابری ل سەر ڤی لایەنیش کارێ کری و نۆکە ئەو رێکوبانێت د ناڤبەرا باژێڕان دا پێشکەفتنەکا باش یا ب خۆڤە دیتی و وەختێ دناڤبەرا باژێڕ و پارێزگەیان گەلەک ل بەری نۆکە یێ کێمتر بووی.
پرۆژەیەکێ دی یێ گرنگ بۆ ئەڤرۆ، کارگەیا ریسایکلینا گلێشی و زبڵی یە. ئەڤ پرۆژەش، ژ بلی کو دێ دەلیڤێت کاری بۆ سەدان کەسان پەیداکەت، چەند مفایێت گرنگ یێت دی، دێ هەبن ل وانا پاراستنا ژینگەیێ و سەرۆکانیێت سروشتی و پارێزگاریکرنا پاقژی و بژوینی یا ئەردی.
جودا ل لایەنێ ساخلەمیش، ل ناڤبرنا گلێشی و زبڵی ب ڤی شێوەیێ نۆکە و سوتنا وی یان بنئاخکرنا زبڵ و گلێشی، گەلەک جارا دبیتە ئەگەرێ بەڵاڤبوینا چەندین نەخۆشیاش ل دەڤەرێ. چونکی هەبوونا پاشڤەمایێت گلێش و زبڵ و بەرمایکا، مەترسی و گەفەکا زۆرا مەزنە ل سەر ژینگەیێ و پیسبوونا ئاخێ و ئاڤا ژێرئەردی، کو ل دویماهیێ دێ کاریگەریەکا خراپ ل سەر ژیانا مرۆڤی هەبیت. لەوا پرۆژێ ریسایکلینا گلێشی، پرۆژەیەکێ گەڵەک گرنگە و ئەم دێ کارکەین، کو ل هەمی ناڤچە و دەڤەرێت کوردستانێ پرۆەژێت ب ڤی رەنگی بێنە ئەنجامدان.
ئەڤرۆ بابەتێ ژینگەپارێزیێ و پاراستنا سەرۆکانیێت سروشتی و سەخبێریکرنا وان ب رەنگەکێ زانستی، ئێکە ل پرسێت جیهانی و ل وان کێشەیێت مەزنە، کو روی ب روی مرۆڤایەتیێ بووینە و ئەم ل هەرێما
کوردستانێ ل ڤێ کێشێ و ئاستەنگێت وێ د دویر نینە، لەوا پێدڤی یە هەمی ئامادەکاریان بکەین بۆ روی ب روی بوونا ڤان ئاستەنگان.
جهێ سوپاسێیە کو خودێی فرسەت دایە مە کو مە پێ چێ ببیت کو ئەو بەڵێنێت مە دای گەلەت ل وان ببنە کردار و ببنە پرۆژە. سەرەڕای ئەو هەموو قەیران و ئاستەنگێت بۆ ڤێ کابینێ هاتینە درستکرن . سوپاس بۆ خودێ بێنفرەهیا هنگۆ و ب پشتەڤانیا کەرتێ تایبەت و ب مانديبونا و دلسۆزیا فەرمانبەرێت حکومەتێ ل کەرتێ گشتی . ئەڤ کابنەیە نە کەفت بەلکی ڕۆژ ب ڕۆژ بەرەڤ سەرکەفتنێ پێنگاڤ هاڤێتن و ئینشاڵلا خودێ فرسەتێ بدەتە مە دێ پێنگاڤێت باشتر و سەرکەفتنێت مەزنتریش ب دەست ئینین و ئو مە وان ماوەیێت چۆی وەختێ گەلەک پێشکەفتن د وارێت کشتوکالی و پیشەسازێیدا هەبووی و مە ل بەرە ئەڤ دەستپێکا بووژانەوا ئابووری وپێشخستنا کەرتێ کشتوکالی و پیشەسازی ببیتە شۆڕەشەکا بووژانەوا ئابووریێ ل هەموو باژێڕ و پارێزگەهێت کوردستانێ.
هیڤیا مە ئەوە هەموو لایەنێت سیاسیت ناڤخۆ و هەموو دۆستێت مە ل دەرڤەش پشتیڤانێت بەرنامێت حکومەتی بن بۆ هندێ مە پێچێ ببیت خزمەتگوزاریێت زێدەتر بۆ خەلکێ هەرێما کوردستانێ دەستەبەر بکەین.
جارەکا دیش دەستخۆشیێ ل کومپانیێت جیبەجیکارێت ڤی پرۆژەی دکەم. هیڤیدارم ب کوالیتیەکا باش ئەڤ پرۆژە بێتە جێ ب جێ کرن و خەلکێ زاخۆ و دەورروبەرێت دهۆکێ وهەمی کوردستان مفای لێ ببینن.
هون بمینن ب خێر و سەلامەتی و كوردستان هەر ئاڤەدان بیت.