شوان زراری، ئەندامی پەرلەمانی کوردستان لە فراکسیۆنی پارتی رایگەیاند، لە دوای تیرۆرکردنی عەقید هاوکار جاف کە زۆر بە ئاشکرا و ڕوونی بۆ هەموو خەڵکی کوردستان ئاشکرابوو و لە دانپێدانەکان بە روونی دەرکەوت کە لە لایەن دەست و پێوەندەکانی بافڵ تاڵەبانی تیرۆرکراوە، بەتایبەتی کە وەهاب هەڵەبجەیی بەرپرسی دژە تیرۆری سلێمانی ، ڕاستەوخۆ سەرپەرشتی تیرۆرکردنی عەقید هاوکاری کردووە.
شوان زراری ئاماژەی بەوەشکرد، کە بافل تاڵەبانی و بەرپرسانی دیکەی یەکێتی، دەستیان بە هەڵمەتێکی چەواشەکارانە کردووە بۆ پەردەپۆشکردن و لە بیربردنەوەی ئەو تاوانە تیرۆریستییە گەورەیەی لە هەولێر لە پێشچاوی ژن و منداڵی هاوکار جاف و هەموو خەڵکی کوردستان ئەنجامیان دا.
پەرلەمانتارەکەی پارتی ئەوەشی خستەڕوو، بافل تاڵەبانی لەجیاتی ئەوەی هاوکاری دەسەڵاتی دادوەری بکات و بکەران و تۆمەتبارانی ئەم کەیسە کە خۆی داڵدەی داون ، ڕادەستی دادگای بکات، کەچی بیانووی بێ مانا و بێسەر وبەر بۆ ئەم تیرۆرە دەهێنێتەوە.
شوان زراری دەڵێت: بافڵ و یەکێتی تا ئەو کاتەی دەزگا ئەمنبیەکان، تاوانی تیرۆرکردنی عەقید هاوکار جافیان ئاشکرا نەکرد، کێشەيان نەبوو. بەڵام دوای ئەوەی دەستیان کەشف بوو، بافل بۆ پەردەپۆشکردنی تاوانەکە، دەستی بە بوختان و تێکەڵکردنی بابەتەکان کرد تا بەخەیاڵی خاوی خۆی، تاوانەکە لە بەر چاوی خەڵک وون بکات.
دەشڵێت: بەداخەوە دەزگای دژە تیرۆری یەکێتی، بووەتە دەزگای تیرۆرکردنی خەڵک و لەماوەی ساڵی ڕابردوودا دەیان تاوانی تیرۆرکردنیان لە سنووری سلێمانی و گەرمیان و پشدەر ئەنجام داوە، کە دیارترینیان تیرۆرکردنی موراد کانی کوردەیی و هاوکارەکانی بوو، هەر بۆیەش ئەنجومەنی ئاسایشی هەرێمی کوردستان بڕیاریدا بودجە بۆ دەزگایەک کە کاری تیرۆریستی ئەنجام بدات سەرف نەکات و بابەتەکەش سیاسی نیە بەڵکو یاساییە.
پەرلەمانتارەکەی پارتی ئاماژەی بەوەشکرد، لای هەموو خەڵکی سلێمانی و کوردستان ئاشکرایە کە گەندەڵی و دزینی سامان و داهاتی سلێمانی و سەرانەسەندن لە بازرگانان و هاوردەکردنی شتی ئیکسپایەر و ماوەبەسەرچوو لە لایەن مافیاکانی بافڵ بەردەوامە. چونکە
بافڵ خەریکی پیلاندانان و فرۆشتنی سلێمانیە و باکی بە هەڵگیرساندنی تەنانەت شەڕی ناوخۆش نیە و هەموو هەوڵەکانی لە پێناو بەزۆر سەپاندنی حوکمڕانی مافیایی خۆیەتی.پرسیارەکە لێرەدا ئەوەیە تا کەی خەڵکی سلێمانی ئەم سووکایەتیەی کە بافڵ پێیان دەکات قبوڵی دەکەن؟ چونکە هۆکاری خراپبوونی دۆخی ئابووری سلێمانی، بافل خۆیەتی کە ڕێگری لە پرۆسەی چاکسازی دەکات بو ئەوەی خۆی دەست بە سەر هەموو شتێکدا بگرێت. بەڵام خەڵکی کوردستان دەبێت دڵنیابن کە چاکسازی و هەوڵی بە سزا گەیاندنی تاوانباران و تیرۆریستان بەردەوام دەبێت.
بافڵ لە درێژەی کارە مافیاییەکانی، هەولی ئەوەی داوە بە نا یاسایی لە پرۆسەی بەرهەمهێنانی غاز پارەی دەست بکەوێت بە بێ ئەوەی وەبەرهێنان بکەن بەڵام کە ڕێگەیان پێ نەدراوە ئەوە بکەن، هەوڵی پەکخستنی پرۆسەکە دەدەن.
“لە کۆتاییدا دەڵێین، کەسێکی رفتار نەخۆش کە باری دەروونی شلەژاوە ، پێویستە چارەسەری حاڵی پەرێشان و شێواوی خۆیان بکات، نەک بڕیار بە دەست بێت و خەڵکی بێ تاوان ، باجی هەڵە و تاوانەکانی ئەم نەخۆشە بدەن.”