ئەمڕۆ 12ی نیسانی 2021، د. ئومێد سەباح، سەرۆکی دیوانی سەرۆکایەتی ئەنجومەنی وەزیرانی هەرێمی کوردستان، لە نوسراوێکیدا کە ئاراستەی وەزارەتی دارایی کردووە، تێیدا هاتووە “ئاماژە بە نوسراوەکانی وەزارەتی شارەوانی و گەشتوگوزار ژمارە 8453 لە 6/9/2021 و ژمارە 11609 لە 11/11/2021، رەزامەندی رێزدار جەنابی سەرۆک وەزیران وەرگیرا، بە تەرخان و خەرجکردنی گوژمەی 70 ملیۆن و 45 هەزار دۆلار، بەشێوەی نەختینە و بەقۆناغ لەسەر بودجەی وەبەرهێنانی شارەوانی و گەشتوگوزار، بەپێی باری دارایی حکومەت بە مەبەستی جێبەجێکردنی پرۆژەی ئاوی گۆپتەپە – چەمچەماڵ”.
ئاماژە بەوەشدراوە، کە وەک قۆناغی یەکەم، بەگوێرەی دەرخستەی هاوپێچ و رێنماییەکانی جێبەجێکردنی گرێبەستە حکومییەکان (ژمارە 2ی ساڵی 2016)ی وەزارەتی پلاندانان، پارەی پرۆژەکە خەرجدەکرێت.
هاوکات قائیمقامیەتی قەزای چەمچەماڵ دەڵێت، رەزامەندی سەرۆکی حکومەتی هەرێم، وەڵامی 77 نوسراو و داواکاری قەزاکەیە، بۆ جێبەجێکردنی پرۆژەی ئاوی گۆپتەپە – چەمچەماڵ، کە دەبێتە هۆی چارەسەرکردنی کێشەی کەمئاوی قەزاکە.
قەزای چەمچەماڵ، لە حەوت ناحیە پێکهاتووە، گرفتی کەمی ئاوی خواردنەوەی هەیە و لە بەشێک لە گەڕەک و ناحیەکانیدا، لە ماوەی هەفتەیەکدا، تەنها یەک جار ئاوی خواردنەوە بەسەر هاوڵاتیاندا دابەشدەکرێت، ئەنجامدانی پرۆژەکە خواستی دانیشتوانەکەیەتی بۆ کۆتاییهاتنی کێشەی کەمئاوی.
