ئێوارەی ئەمڕۆ سێشەممە 23ی نۆڤێمبەر ، مەسرور بارزانی سەرۆکی حکومەتی هەرێمی کوردستان، پەیوەندییەکی تەلەفۆنی لە مارگریتس شیناس جێگری سەرۆکی کۆمسیۆنی یەکێتی ئەوروپا پێگەیشت. لە پەیوەندییەکەدا ، دۆخی کۆچبەرانی سەرسنووری بێلارووس و پۆڵەندا تاووتوێ کرا.
سەرۆکی حکومەت داوای کرد، وڵاتانی یەکێتی ئەوروپا ، فریاگوزاری و هاوکاری پێویست بگەیەننە کۆچبەران . هەردوولا هاوڕابوون لە سەر ئەوەی، بازرگانانی مرۆڤ و تۆڕی نێودەوڵەتی قاچاخچییەکان، کۆچبەران بۆ مەبەستی سیاسی بەکاردەهێنن .
سەرۆکی حکومەت ئاماژەی بە گەڕانەوەی زیاتر لە 400 کۆچبەردا، کە بە شێوەیەکی ئارەزوومەندانە گەڕاونەتەوە هەرێمی کوردستان و عێراق، بڕیارە بەم نزیکانەش، چەندین کۆچبەری دیکە بگەڕێنەوە.
سەرۆکی حکومەت جەختی لە گرنگیی هەبوونی ستراتیجییەکی درێژخایەن لە نێوان عێراق و هەرێمی کوردستان و یەکێتی ئەوروپا کردەوە، بۆ سنووردانان بۆ کۆچکردنی نایاسایی ، هەروەها داواشی لە جێگری سەرۆکی کۆمسیۆنی یەکێتی ئەوروپا کرد، لە ڕێگەی پەرەپێدانی ئالوگۆڕی بازرگانی و وەبەرهێنانی ئەوروپا و هاوکاری دارایی و تەکنیکی، پشتیوانی لە کارنامەی چاکسازیی حکومەتی هەرێمی کوردستان بکەن و ئەمەش دەبێتە هۆی زیادبوونی دەرفەتی کار بۆ خەڵکی کوردستان ، سەرۆکی حکومەت، هەروەها دووپاتی کردەوە کە پێویستە کۆمەڵگەی نێودەوڵەتی هاوکاری زیاتر پێشکەشی ئەو ئاوارە و پەنابەرانە بکات کە لە هەرێمی کوردستانن.
لە پەیوەندییەکەدا ، هەروەها باس لەو ڕێکارانەش کرا کە لە لایەن حکومەتی هەرێمی کوردستان و حکومەتی فیدرالییەوە گیراونەتەبەر سەبارەت بە ڕێگەگرتن لە کۆچکردنی نایاسایی.
سەرۆکی حکومەت، ئامادەیی هەرێمی کوردستانی دەربڕی بۆ پێشوازیکردن لە تیمێکی تەکنیکی کە لە بروکسلەوە سەردانی هەولێر و بەغدا بکات بۆ گرتنەبەری ڕێکاری پێویست.
هەردوولا هاوڕابوون لە سەر بەردەوامبوونی پەیوەندیی و هەماهەنگیی، بۆ ئەو بابەتانەی جێی بایەخی هەردوولان.