سەرۆكی حكومەتی هەرێمی كوردستان سەرەخۆشی لە كەسوكاری قوربانییانی كارەساتەكەی نەخۆشخانەیەك لە شاری زیقار دەكات و وەزیری تەندروستیش بۆ پێشكەشكردنی هاوكاری بۆ بریندارانی ڕووداوەكە ڕادەسپێرێت.
بەیانیی ئەمڕۆ سێشەممە ١٣ی ٧ی ٢٠٢١، مەسرور بارزانی، سەرۆكی حكوومەتی هەرێمی كوردستان لە تویتێكدا هاوخەمیی خۆی بۆ خەڵكی زیقاڕ و تەواوی عێراق راگەیاند، بەهۆی ئەو كارەساتەی كە لە نەخۆشخانەیەك كەوتەوە.
مەسرور بارزانی سەرەخۆشی لە كەسوكاری قوربانییان كردووە و رایگەیاندووە: ”وەزیری تەندروستیی هەرێمی كوردستانم راسپارد تاوەكوو هەموو هاوكارییەكی پێویست بۆ برینداران پێشكەش بكات“.
درەنگانی شەوی دووشەممە 12-7-2021، ئاگرێکی گەورە لە نەخۆشخانەی ئیمام حوسێن، کە تایبەتە بە چارەسەرکردنی تووشبووانی پەتای کۆرۆنا لە ناسریە، کەوتەوە و بەهۆیەوە زیاتر لە 62 نەخۆش و هاوەڵی نەخۆش، بە سووتان گیانیان لەدەست دا و ژمارەیەکی دیکەش بریندار بوون.