حکومەت: یەک ملیۆن ژەمە ڤاکسینی تر دەگاتە هەرێمی کوردستان
ئەمڕۆ چوارشەممە 25-08-2021 فەرمانگەی میدیا و زانیاریی حکومەتی هەرێمی کوردستان لە ماڵپەڕی خۆیان رایگەیاند، زیاتر لە ملیۆنێک قورچکی ڤاکسین گەیشتووەتە هەرێمی کوردستان کە پێکهاتوون لە 524 هەزار و 160 قورچکی فایزەر، 216 هەزار و 230 قورچکی ئەسترازێنیكا و 423 هەزار و 790 قورچکی سینۆفارم، كە كۆی گشتی دەکاتە ملیۆنێك و 164 هەزار و 180 قورچک، لەو بڕەش 95 هەزارقورچکی ئەسترازێنیكا لەلایەن حكومه‌تی ئوردنەوە بە هەرێمی كوردستان بەخشراوە.
بەپێی ئاماری وەزارەتی تەندروستیی هەرێمی کوردستان، تێكڕای ئەوانەی لە سنووری هەرێمی كوردستان كوتراون، ژمارەیان 581 هەزار و 56 كەس بووە، لە تەواوی ئەو ژمارەیەدا كە كوتراون 308 هەزار و 860 كەس فایزەر و 162 هەزار و 266 كەس ئەسترازێنیكا و 109 هەزار و930 كەسیش سینۆفارمیان وەرگرتووە، لە كۆی گشتیی ئەو رێژەیەیش 395 هەزار و 427 كەس قورچکی یەكەم و 184 هەزار و 629 كەسیش قورچکی دووەمیان وەرگرتووە.
وەزارەتی تەندروستی ئەوەشی خستوەتە ڕوو، كە رۆژانە 10 هەزار ژەمی ڤاكسین لە هاووڵاتیان دەدرێت.