هەوڵ ئەدەم بە پوختی باسی هاتنی شاندی حکوومەت بۆ پەرلەمان بکەم بۆ بەرچاو ڕوونی خەڵکی کوردستان
*حکوومەتی هەرێم ئامادەیە نەوت تەسلیم بکات و ڕێک بکەوێت لەگەڵ بەغدا.
*ڕێک نەکەوتنی ئێمەو بەغدا سیاسییە، غرورێکی بێ مانا هەیە لەوێ هەموو شتێکی هەرێمی کوردستان بە زیادەو زۆر دەزانن.
*عێراق دابەشی دوو بەرە بووە، بەرەیەکی بەهێزو یەکی لاواز، بەرە بەهێزەکە دژی هەموو شتێکی هەرێمی کوردستانە.
*بەشێکی پەرلەمانتارانی عێراق بە زمانی هەڕەشەو قسەی زبر لەبارەی هەرێمی کوردستان گفتوگۆیان کردووەو بەشێکی کەمیان لایەنی سوڵحبوون.
*ئەو نەهجە دژە کوردەی لە بەغدا هەیە نەک باوەڕی بە جێبەجێکردنی دەستوور نیە بگرە دژی کۆی ماددەکانی پەیوەست بە کوردە لە دەستووردا.
*بەشێکی لاوازی مەوقیفی ئێمە لە بەغدا پەیوەستە بە پەرتەوازەیی لایەنەکان و یەک دەنگ نەبوونیان، بەشێکی پەرلەمانتاران لە بەغدا ڕۆڵێکی ناشیرین و دزێو دەگێرن و بوونەتە چاوساغ و زانیاری پێدەری لایەنە عێراقییەکان و قسەکانی ئەوان دژی هەرێمی کوردستان بەکار دەهێنن.
قسەو پێشنیازی ئێمە بۆ بەڕێز سەرۆکی شاندو تەواوی ئەندامانی شاندەکە ئەمەبوو:
*ئەوەی کراوەو دەکرێت کات کوشتنەو عێراق نییەتی نییەو نەبووە ڕێک بکەوێت هیچ ڕێکەوتنێکیش گەرەنتی نییە مادام لایەنی دژە هەرێمی کوردستان بەهێزە، کێشەی ئێمە لەگەڵ عێراق مووچەو چەندین بابەتی دیکەی سیاسی گرنگە ئەگەر چاکسازی جدی بکەین بەو مەوقیفە زەعیفەوە ناچینە بەردەم ئەوان ئەوان کە ڕۆژانێک لەسەری بڵندو دوکان مووحتاجی سڵاوێک بوون ئێستا خەڵکی کوردستان برسی دەکەن.
*لەبری کات کوشتن باشترە بگەرێنەوە هەرێمی کوردستان، خاڵی سنووری،نەوت،چاکسازی لە مووچەو مەرزەکان و سەرجەم سێکتەرەکان بکەنە خەمی شەوو رۆژتان واز لە وردە کێشەی لابەلا بهێنن و هەرکەسێک بووە سەر ئێشە بۆ چاکسازی یان سزای بدەن یان بە خەڵک بڵێن کێیە.
*خەڵک ماندووەو بازاڕ دۆخی خراپەو دەبێت خەمی خەڵک بەجدی وەربگرن، عەدالەت هەبێت خەڵک بەرگەی ناڕەحەتی دەگرن، بەڵام ناکرێت یەکێک لەئەرزو یەک لە ئاسمان بێت، چەند پەلە بکرێت بۆ چارەسەری ئەم دۆخە هێشتا درەنگە.
*لایەنەکان دەبێت بەجدی لەگەڵ حکوومەت بن بۆ چاکسازی،بەڕێز سەرۆک وەزیران لەم پرسەدا جدییە بەڵام دەبێت هەموو هاوکار بین و چاکسازی هەڵمەتێکی نیشتیمانی دەوێت، ناکرێت بەڕۆژ بڵێیت لەگەل چاکسازیم،بە شەو خەریکی شتێکی دیکەبیت، چارەسەری دۆخی کوردستان پێویستیی بە دیدێکی نیشتیمانییانە هەیەو ملشکاندن و بەربوونە یەکتری ئەم هەرێمە بەرەو هەڵدێر دەبات.
پێشەوا هەورامانی